Tayer di debate pa stimulá pensamentu krítiko

Tayer di debate pa stimulá pensamentu krítiko

 

Fundashon Debat.ed ta pone enfasis riba e nesisdat pa tin un komunidat krítiko i kon por logra esaki mediante debate. Pa e rason aki Debat.ed ta organisá un tayer di debate pa adulto riba 12, 19 i 26 di novèmber próksimo.

 

“Changing Minds” ta e mishon di Debate Education Foundation Curaçao [Debat.ed] . Pa e ultimo kuater aña, Debat.ed tabata involukrá den diferente proyekto pa stimulá pensamentu krítiko na Kòrsou, mediante debate. Proyektonan manera Debate den Bario, moderashon di diferente debate i tambe tayernan ta ilustrá ku debate no ta solamente algu pa polítikonan. Edukashon di Debate ta enserá kombiná i integrá di un forma struktural diferente método (arte, deporte & debate) pa mehorá abilidat di partisipantenan.

 

Kada bes ta mas visibel ku pensamentu krítiko ta hasi falta den nos espasionan públiko i privá; diskushonan ku ta bira personal o violento ta lantando kabes i tambe e fenómeno di ‘fake news’. E abilidat pa prosesa informashon, separá loke ta “fake news” for di notisia bèrdat i formulá bo mes opinion riba loke ta pasa rondó di nos, tur bo por siña via di debate. Tambe ta esensial pa un persona sa kon pa formulá un argumento i hiba un diskushon sano.

 

Pa e rason aki Debat.ed ta intensifikando su esfuerso pa brinda tayer i proyektonan pa komunidat. Dianan 12, 19 i 26 di novèmber Debat.ed ta presentá e kurso bàsiko di debate pa adulto (18+). Nos lo trata tópikonan manera kon argumentá pa konvensé otro, kon reakshoná di forma efektivo i kon pa defendé bo posishon durante kualke diskushon o debate. Ademas bo ta traha riba kon bo ta presentá dilanti públiko i komuniká mihó. Registrashon ta possible via https://ai.debated.cw/workshop. Einan por haña tur detaye adishonal pa e tayer aki.

 

Pronto nos lo lansa nos klup di debate pa adulto i tambe e kurso Debate den Klas ku ta yuda maestronan i lidernan di ‘afterschool programs’ pa apliká téknikanan di debate ku nan gruponan.  Pa 2023 nos lo tin varios torneo i otro proyekto pa sigui kambia mentenan lokal. Pa keda na altura di tur desaroyo por sigui nos riba retnan sosial bou di nòmber @debat.ed.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: