E PROMÉ EDISHON DI CARIBBEAN SPORTS WEEK 2022 TABATA ÉKSITOSO!
E PROMÉ EDISHON DI CARIBBEAN SPORTS WEEK 2022 TABATA ÉKSITOSO!
Riba dianan 1, 2, 3 di novèmber último a tuma lugá e promé edishon di Caribbean Sports Week 2022 den Acoya Curaçao Resorts, Villas & Spa. Orange Sports Forum, Federashon Futbòl Kòrsou, Federashon Beisbòl Kòrsou i e Federashon di Atletismo a uni forsa pa organisá 3 dia kargá ku hopi informashon i diskushonnan interesante dirigí riba deporte en general pero prinsipalmente futbòl, beisbòl i atletismo.
Riba e 3 dianan aki diferente oradó lokal i internashonal a duna un presentashon tokante diferente tópiko relatá na deporte i mas ku klaro ta tin diferente seshon kaminda esnan presente por a interkambiá di opinion i diskutí riba e tópikonan ku a bini dilanti.
Orange Sports Forum ta un inisiativa di diferente kompania Hulandes ku ta traha huntu pa desaroyo di deporte. Tambe e por wòrdu konsiderá komo un plataforma pa promoshon di tur kompania i organisashon ku tin konekshon ku deporte na Hulanda. Nan ta traha riba infrastuktura, akomodashon, finansiamentu, promoshon i diferente aspekto ku ta di sumo importansia den deporte. Asina e diferente kompanianan aki por tin kontakto ku otro pa krea oportunidatnan nobo den e merkado di deporte.
Orange Sports Forum ta di opinion ku Karibe ta e kas di diferente atleta ku hopi potensial pa triunfá den deporte riba plano internashonal. P’esei nan a tuma inisiativa pa organisá e Caribbean Sports Week aki na Kòrsou den estrecho kolaborashon ku e 3 federashonnan ariba menshoná.
Federashon Futbòl Kòrsou, Federashon Beisbòl Kòrsou i e Federashon di Atletismo ta sumamente kontentu ku e inisiativa di Orange Sports Forum pa organisá e promé edishon di Caribbean Sports Week, kual ta un otro prueba ku deporte ta trese union sin importa e tipo di deporte, sekso òf edat di e deportista. E meta di e kolaborashon aki, ta pa duna mas atleta lokal oportunidat pa profilá riba un nivel internashonal na un manera profeshonal, ku yudansa di Hulanda i tambe otro paisnan den Karibe. Tambe ta e intenshon pa promové Kòrsou komo un ‘sport tourism hub’ pa asina atrahé mas turista na nos dushi isla, ku tur e benefisionan ku esaki por trese kuné. Huntu nos lo logra kosnan grandi den deporte aki na Kòrsou.
Tur e partisipantenan por a disfrutá di diferente presentashon i a optené hopi mas konosementu riba diferente aspekto di e 3 deportenan aki.
Por spera riba un siguiente edishon di Caribbean Sports Week aun mas grandi ku e edishon aki.
7 novèmber 2022
