Prevenshon kanser na pechu

Presidente di Parlamento

Sra. C. America – Francisca

Wilheminaplein #4

Presente

 

Kòrsou, 04 di novèmber 2022

 

Tópiko: prevenshon kanser na pechu

 

Apresiabel presidente di Parlamento sra. America-Francisca,

 

Na e momentonan aki kanser na pechu ta e tipo di kanser mas frekuente na Kòrsou. Segun último investigashon, 1 di kada 7 persona ta haña nan mes konfrontá ku e malesa aki. Kanser na pechu detektá den un fase tempran, por risibí tratamentu di forma eksitoso. Den kuadro di esaki, konsientisashon, edukashon i informashon ta sumamente importante. Mas tantu konosementu nos komunidat tin tokante e malesa aki, mas chèns nos tin pa kombatié.

 

Un hende muhé ta keda rekomendá, na momento ku e hasi 45 aña, pa e kuminsá hasi kontrol di mamografia. Esaki ta un tèst, ku ta yuda detektá sèlnan kanserigeno den òf rondó di e pechu.

Ademas via di fundashon prevenshon, ya pa algun aña tin kampaña di mamografia pa e grupo riba 45 aña. E maneho aki sigur ta yuda ku detekshon, pero nos mester kuminsá hasi mas.

 

NGO’s nan pa aña ta promové un bida saludabel, komo prevenshon primario. Stress i obesitas ta motibunan ku ta kontribuí na desaroyo di kanser na pechu.

 

Ta importante ku parlamento komo órgano legislativo, pero tambe den e ròl di representashon di pueblo ta bon na altura di e desaroyonan den nos komunidat. I tambe kontribuí na desaroyo di maneho ku ta yuda nos hendenan tin un bida mas salú. Pa e motibu aki suskritonan ta pidi un reunion di komishon sentral abase di artíkulo 33 di nos reglamentu di òrdu. Kaminda ta invitá fundashon Sinta Ros pa duna un presentashon di e desaroyonan rondó di kanser na pechu.

 

 

Danki di antemano,

Miembronan di Parlamento, Partido Alternativa Real