2022 TA HABRI KÒRSOU SIN PRESUPUESTO/29 di Desèmber 2021

 

 

2022 TA HABRI KÒRSOU SIN PRESUPUESTO/29 di Desèmber 2021

Debi ku ainda no a publiká e lei di presupuesto:
Fin di novèmber, komienso di desèmber 2021 parlamento a trata presupuesto 2022. Di kual un mayoria den parlamento a bai di akuerdo ku esaki. Frakshon di MAN a vota kontra presupuesto pa diferente motibu di kual esaki ta un di nan.
For di tratamentu di presupuesto den komishon sentral, frakshon di MAN a indiká ku e presupuesto aki no ta kumpli reglanan ankra den nos areglo di estado i Rijkswet Financiel Toezicht(RFT). Esaki pa motibu ku e presupuesto tin defesit.
Konforme artikulo 85 insiso 2 i 4 pero tambe artikulo 15 di Rijkswet Financiel Toezicht e presupuesto aki no ta na òrdu.
Frakshon di MAN a indiká for di komienso ku ora a entrega e presupuesto no a hasi petishon na Konseho di Minister di Reino pa apliká artikulo 25 ku ta duna eksonerashon di e normanan/reglanan di presupuesto ankrá den artikulo 15.
Despues Gobièrnu di Kòrsou a hasi e petishon aki. E petishon aki mester a wordu tratá 17 desèmber ultimo den konseho di minister di reino. Pero manera ta konosi ku den e reunion aki a bini un impase i niun desishon no a wordu tuma.
Esaki ta trese kune ku no por publiká e lei di presupuesto 2022 debi ku e presupuesto tin un defesit i kual no tin eksonerashon pa akapara e defesit aki. Ku esaki Kòrsou lo habri 2022 sin presupuesto 2022 publiká, ku ta trese kune ku gobièrno lo mester funshoná konforme presupuesto 2021. Ta pa prome biaha den pais Kòrsou ku nos ta habri aña sin un presupuesto di aña publiká.
Ku e situashon aki ta hasi tera fertil pa CFT komo organo konforme normanan di kumplimentu ku presupuesto hasi petishon na Konseho di Minister di Reino pa un “aanwijzing”.
Frakshon di MAN a alerta gobièrnu for di un prinsipio riba esaki, mirando ku esaki tabata un remarke di CFT riba e presupuesto. For di prome ku manda e presupesto aki parlamento mester a sòru pa hasi e petishon pa haña eksonerashon.
Na e monento aki mester warda na momento ku Konseho di Minister di Reino reuní pa tuma un desishon riba e petishon di Gobièrnu di Kòrsou. Tambe mester wak si Konseho di Minister di Reino lo bai di akuerdo ku desviashon konforme petishon di Gobièrnu di Kòrsou. E situashon aki ta preokupante i lo ta un di e prome temanan pa frakshon di MAN den 2022.
Frakshon di MAN ta lamentá pa konstatá ku aña 2022 ta habri nos sin un programa di Gobernashon i sin un presupuesto 2022 publiká.

This site uses Akismet to reduce spam. Learn how your comment data is processed.

%d bloggers like this: