MINISTER CHARLES COOPER TA INOUGURÁ LUSNAN DI KAYA LED INTELIGENTE DEN SENTRO DI SIUDAT

MINISTER CHARLES COOPER TA INOUGURÁ LUSNAN DI KAYA LED INTELIGENTE

DEN SENTRO DI SIUDAT

 

Willemstad 10 di novèmber 2022- Minister di Tráfiko, Transporte i Planifikashon Urbano (VVRP), Sr. Charles Cooper, a sende den forma ofisial djaweps 10 di novèmber e lusnan di kaya LED inteligente ku a keda instalá durante e simannan tras di lomba den nos sentro di siudat. A duna atenshon speshal na e momentu aki mirando ku ta despues di 30 aña ku a kambia tantu lus komo palunan di lus. Netamente dor di esaki tabatin algun reto pero e kontratistanan CIS, E-lux, Kla pa Solushon i A.C.T.O. Jams a traha ku dedikashon pa kaba e trabounan nèt na tempu pa e temporada festivo di fin di aña. Por nota ku awor kayanan di Punda i Otrobanda tin mas iluminashon, e palunan nobo di lus a keda mas modèrno, i e totalidat ta trese un ambiente mas ameno ku alabes ta krea un sentido di seguridat den oranan di anochi. E proyekto ta un esfuerso di Aqualectra, den estrecho koperashon ku Ministerio di Desaroyo Ekonómiko (MEO) i Ministerio di Tráfiko, Transporte i Planifikashon Urbano  (VVRP). Esaki sigur ta un esfuerso konhunto pa alsa e bunitesa di nos sentro di siudat den e aña aki ku nos ta konmemorá e di 25 aña ku Willemstad ta riba e lista di Patriminio Mundial di UNESCO. 

 

Aqualectra ta kambiando lusnan di kaya rònt Kòrsou komo parti di e trayekto di transishon energétiko aki na Kòrsou. E transishon energétiko ta enserá ku lo kuminsá hasi uzo di energia renobabel, manera energia generá dor di molina di bientu i uzo di ‘Liquified Natural Gas (LNG)’ pa produkshon, pero tambe ta kuminsá hasi uzo mas efisiente di energia produsí. E lusnan di kaya LED inteligente aki ta kontribuí ku e desaroyo di transishon energétiko ya ku nan ta gasta ménos koriente ku esnan konvenshonal. Meskos ku demas lusnan di kaya LED inteligente, esakinan tambe por keda monitoriá i operá efisientemente for di un punto sentral na Aqualectra. Di e forma aki Kòrsou ta dal un paso mas den krea e ret inteligente di distribushon komo parti di e transishon energétiko ku Aqualectra ta liderá.