Mikrofon di interupshon i Ora di Pregunta komo parti di e sistema di traha di Parlamento!
Durante e Reunion Públiko di Parlamento di djaweps dia 10 di novèmber 2022, Parlamento a aprobá kambio di e Reglamento di Orden di Parlamento riba proposishon di e komishon di Prosedimentu di Parlamento, despues ku Komishon Sentral ya a prepará i deliberá riba e kambionan aki den luna di yüni último. Ku e kambionan aki un Miembro di Parlamento lo tin na su disposishon e manera pa durante kualke debate hasi uzo di e instrumento di interupshon. Esei lo hasi kualkier debate mas dinámiko i oumenta nivel di demokrasia.
Banda di esaki Parlamentarionan por pidi un minister pa bin Parlamento pa kontesta preguntanan riba kualke tema di urgensia a base di e asina yamá “vragenuur”. E prosedura pa e “vragenuur” a keda aprobá.
Promé ku e kambionan aki drenta na vigor lo mester publiká esakinan. Mientras tantu Parlamento lo organisá sekshonnan di treinen pa miembronan i personal pa asina por hasi uso efektivo di ambos instrumento despues di publikashon di e kambionan anunsiá.