GOBIERNU TA SKONDE TRAS DI STINAPA. Falta di maneho, planifikashon i mantenshon ta krea problema ku awa.
GOBIERNU TA SKONDE TRAS DI STINAPA.
Falta di maneho, planifikashon i mantenshon ta krea problema ku awa.
Kralendijk – 13 di novèmber 2022. Nos no a siña nos lès. Nos no a krea pa añanan un infrastruktura ku mester a sirbi nos pa move riba e isla ku pa awe nos kareteranan ta den mal estado i lo kosta miónes pa drechá i konstruí kareteranan nobo.
Nos grandinan si a siña, nan si den tempu di yobida a sinta studia e pasashi natural di e awa den e barionan, na unda e roinan ta kore i a traha dam i/o tanki pa tene e awa riba nos isla. Awa ku nan por a usa pa diferente metanan. Traha dam pa warda awa ta un ekspreshon basa riba e sabiduria aki. I den tempu di sekura nan tabata bon konsiente ku mester a tene tantu e roinan, komo e tanki i damnan limpi pa e siguiente temporada di yobida. Nos diputado enkargá pa añanan ku infrastruktura, prosedente di e bario di Rincon, a neglishá e partinan aki por kompleto. I no e so, sino henter e gobernashon.
E situashon di awa ku a yena lugá i keda para no tin nada di aber ku STINAPA sino simplemente ta konsekuensia di falta di maneho di mantenshon di infrastruktura di parti di gobièrnu. Falta di mantenshon di “afvoernan”, falta di mantenshon di roi i riolnan, falta di mantenshon di dam i tankinan. Falta di maneho pa krea plan di parselashon i di duna pèrmit di konstrukshon sin tene kuenta ku deshecho di awa (afwatering). Ta konosí ku nos infrastruktura no ta traha pa akapará ni deshasí hopi awa i ta bini aserka ku hopi “afvoer” tabata será pa motibu di falta di mantenshon; por mira kla kon yerba i tera/lodo a será esakinan i stroba pasashi di awa.
Manera STINAPA a deklará nan no tin nada di aber ku infrastruktura. STINAPA no tin ningun outoridat pa por òf duna òrdu pa será ningun “afvoer”. Awor nos ta mira kon gobièrnu ta kibra kaminda pa limpia “afvoernan” ku tin tempu sin mantenshon i ku ta tur será ku lodo i vários otro tipo di material.
Nos grandi nan a krea un sistema di dam i tankinan kombiná ku e saliñanan pa akapará e awa i warda esaki pa usa pa diferente meta. Esaki kombiná ku roinan i riolnan pa dirigí e awa.
Nos a duna pèrmit di konstrukshon sin tene kuenta ku e sistema di dirigí i akapará awa aki i awor nos ta lamentá. Pa kolmo no tin un maneho pa mantenshon di e sistema aki tampoko.
Saliña di Vlijt por akapará e awa promé ku e bai laman. Pero e saliña aki a yena ku lodo i no a hasi nada na esaki. Pa sùit di stadion te na airport tambe tin un saliña pero a yena esaki ku konstrukshon, i asina mi por menshoná mas saliña pero tambe dam i tankinan ku a keda kompletamente neglishá òf ku hasta a duna pèrmit pa traha kas den tanki (tanki matrimonio) òf traha konstrukshonnan ku ta stroba pa e awa haña su pasashi pa e bai den dam, tanki òf saliña pero a yena esaki ku konstrukshon i no a sòru pa bon deshecho di e awa.
Tin mas kaminda ku a konstruí den dam i no a sòru pa un bon pasada di awa. Asina por menshoná mas kos ku ta kontribuí na e situashon ku nos a haña nos aden.
Nos grandinan tabatin esaki mihó bou di kontrol, i nos tambe mester por ku tur sabiduria di pasado, teknologia i ekiponan moderno ku nos tin awor. Nos mester por hasi un mihó trabou pero si no tin maneho esaki no ta posibel. Tur kos ku ta mediokre aki ta pa falta di maneho. Den e kaso spesífiko aktual di gran kantidat di awa ku a keda para okashonando tantu molèster pa nos abitantenan, mester bini ku maneho pa akapará mas tantu awa posibel, un sistema di tanki, dam, kombiná ku e saliñanan, maneho pa deshasí di e awa di mas, un sistema di roinan, “afvoernan” i riolnan i por último mester di un maneho pa mantenshon di e sistemanan aki. Tur esakinan ta responsabilidat di gobièrnu.
E loke a sosodé ta un bon momento pa nos gobièrnu a aserká gobièrnu Hulandes i deklará Boneiru komo un aria di kalamidat. Ku e konosementu awor ku awa a kai, ingenieronan di tur disiplina lo por a bin huntu i diseñá un plan pa enfrentá e futuro ku a konsekuensia di kambio di klima lo tin mas sorpresa pa nos. Ban traha dam warda pa awa i no tira falta riba ningun hende o instansia, sino diputado di infrastruktura i gobièrnu,
