Promé Minister Gilmar Pisas a sera konosí ku e Presidente di e hunta di KOMISARIO di CAP

Promé Minister Gilmar Pisas a sera konosí ku e Presidente di e hunta di KOMISARIO di CAP

 

Willemstad – Promé Minister sr. Gilmar Pisas a sera konosí ku e presidente di hunta di komisario di Curacao Airport Partners (CAP) sr. Fabio Russo Correa dia 17 di novèmber 2022.

 

Di parti CAP tabata presente tambe sr. Johnny Andersen ku ta e CEO di CAP.

 

Esaki tabata un bishita di kortesia kaminda a hasi uso di e oportunidat pa sr. Fabio Russo Correa duna Promé Minister sr. Pisas informashon riba e futuro plannan di desaroyo di CAP.

 

A elaborá durante di e bishita riba diferente invershon ku CAP ke bai hasi na nos Aeropuerto i e área rondo di Aeropuerto. A papia tambe tokante posibilidat pa amplia e kapasidat pa stashoná mas avion, posibilidat pa mas avion privá bini Kòrsou, krea un “Government Dignitary Room”, ampliashon di buelonan for di Brazil, operashon di kargo, posibilidat di preclearance i produkshon di energia bèrdè.

 

Promé Minister sr. Pisas a gradisí sr. Fabio Russo Correa pa tur informashon ku e la risibí di parti di CAP.