MINISTER COOPER PRESENTE NA INISIO OFISIAL DI KONSTRUKSHON DI EDIFISIO NOBO PA ADC

MINISTERIO KONSERNÍ TRÁFIKO, TRANSPORTE I PLANIFIKASHON URBANO

 

MINISTER COOPER PRESENTE NA INISIO OFISIAL DI KONSTRUKSHON DI EDIFISIO NOBO PA ADC

PUBLIKÁ RIBA 18 NOVÈMBER 2022

Willemstad – Riba djabièrnè 18 di novèmber, Minister Charles Cooper tabata presente pa huntu ku ADC selebrá inisio ofisial di trabounan di konstrukshon di nan edifisio nobo.

 

Na juli 2021, Minister Cooper a hasi entrega di e pèrmit di konstrukshon, i awor ADC ta asina leu ku trabounan por kuminsá. E edifisio a keda diseñá dor di arkitekto yu di Kòrsou Lyongo Juliana di OZ Architects. Bunita pa mira tambe ta ku kontratistanan lokal lo ehekutá e proyekto aki, esta Q-Con Quality Constructors, Installation Technologies, SimplAire i Industech.

 

E laboratorio lo ta unu ultra-moderno kaminda tur disiplina di ADC lo ta huntu bou di un dak. E edifisio lo tin 3 piso, i lo tin un grandura total entre tur piso di 5500 meter kuadrá. E proyekto aki ta repartí den fase i lo terminá denter di 2 aña, i e ta konta ku un invershon total di 15 mion florin. Esaki sigur lo ta un proyekto médiko di impakto grandi pa nos pais. E proyekto médiko aki lo hasi Kòrsou úniko den Karibe den e aspekto di laboratorio.

 

ADC ta bai halsa kalidat i potensial di nan servisio pa Curaçao Medical Center (CMC).  Pa logra e meta aki, nan a risibí nan pèrmit di konstrukshon pa por konstruí un edifisio úniko den Karibe banda di CMC. Esaki despues ku Gobièrnu di Kòrsou a bai di akuerdo pa hasi ADC e laboratorio ku ta duna servisio na CMC.

 

Durante di e tratamentu di e pèrmit di konstrukshon, diferente entidat di Gobièrnu a tene debido kuenta ku aspektonan importante manera e parti di seguridat pa ku kandela, drenahe di awa pa ku e edifisio, i tereno debí ku e lokalidat ta situá na Hamelbergweg den Otrobanda.

 

ADC su edifisio nobo ta kuadra ku e vishon di Gobièrnu pa lokual ta konsentrashon di aktividat rondó di nos hospital nobo i desaroyo den nos sentro di siudat. Minister Cooper su ministerio a kana un trayekto intensivo ku e arkitekto pa yega na un diseño ku ta reflehá un apariensia di siglo 21, pero alabes ta kumpli ku kondishonnan di nos sentro di siudat.

 

E edifisio lo ta konektá direktamente ku entrada prinsipal di CMC pa medio di e plenchi ku ta forma parti di CMC kaba. E edifisio lo bai forma un di e fachadanan di e plenchi nobo ku ta konektá CMC nobo ku e área históriko di Otrobanda.

 

Minister Charles Cooper ta hopi kontentu ku e proyekto aki. E ta ofresé CMC i pais Kòrsou un posishon úniko den Karibe, i ta krea perspektiva pa mas desaroyo den Otrobanda.

                 

Share this page to Telegram

This site uses Akismet to reduce spam. Learn how your comment data is processed.

%d bloggers like this: