MEGA PROYEKTO DI SIENSIA, INVESTIGASHON I EDUKASHON PA KÒRSOU

 Willemstad- Djaweps último, dia 17 di novèmber 2022, Minister di Desaroyo Ekonómiko, sr. Ruisandro Cijntje huntu ku Promé Minister sr. Gilmar Pisas i Minister di Salubridat Públiko, Medio Ambiente i Naturalesa, sra Dorothy Pietersz-Janga, a tene un enkuentro sumamente interesante ku ingeniero i sientífikonan internashonal riba un mega proyekto ku ta karga e nòmber Proteus. Proteus  lo ta un laboratorio bou di laman ku lo fungi komo sentro di investigashon i siensia pa mundu. Kòrsou a keda selektá pa establesé e mega proyekto akí pa motibu ku, kontrali na otro partinan di Karibe, nos ta e úniko sitio kaminda koralnan ta keda desaroyá i sprùit di forma natural. Pues esaki ta hasi Kòrsou úniko pa establesé e stashon nóutiko akí. Ta spera di por finalisá Proteus pa aña 2026 den área di Fuik i esaki lo bira un fuente di desaroyo di siensia, investigashon i edukashon ku lo atraé un tipo di turismo nobo pa nos pais, kual ta turismo di siensia.

E grupo di sientífiko i ingenieronan ku ta di bishita na Kòrsou den kuadro di e megaproyekto akí, ta enkabesá pa sr. Fabian Cousteau kende ta nietu di e legendario oseanógrafo Jacques Costeau. E bishita a keda hasí posibel pa medio di CINEX i e intenshon ta pa huntu ku Gobièrnu di Kòrsou traha huntu pa Proteus por ta un éksito.
Ministerio di Desaroyo Ekonómiko (MEO) tin e afan pa diversifiká Kòrsou su ekonomia mas tantu posibel, reforsá pilánan ekonómiko nobo i atraé invershonnan di impakto pa Kòrsou. Den e Strategia Nashonal pa Ekshportashon di Kòrsou (NES), ku awor akí ta den implementashon dor di MEO, por tuma nota ku pa por logra esaki ta pone atenshon entre otro riba e Sektor di ‘Blue Bio Economy’. Atenshon riba e sektor akí ta nifiká, ku nos ke hasi uso entre otro di e rikesa di nos naturalesa i nos laman komo fuente di desaroyo duradero i bienestar pa Kòrsou. Apesar di kambionan klimatológiko i kalentamentu di oséano durante e último tempunan, Kòrsou a logra di por protegá parti di nos lamannan i asina garantisá ku koralnan ta keda reprodusí i piskánan tin un ekosistema salú pa sigui brui. Un balorashon di Wait Institute di nos koral ta ilustrá ku nan ta generá USD 400 mion pa aña komo atrakshon turístiko. Si nos no kuida nan i protehá nos naturalesa, nos ta pèrdè e entrada aki. Mirando e balor di nos laman i koralnan, esaki por fungi komo fuente di desaroyo duradero pa Kòrsou den proyektonan manera Proteus, pero tambe atrakshonan manera buseo, peska i turismo di playa.
Durante e kombersashonnan ku Sr. Costeau, el a felisitá Kòrsou pa ta un pionero den Karibe pa ku desaroyo di un plan konkreto pa diversifiká nos ekonomia via di p.e nos laman.

Den e kombersashon akí, Minister Cijntje a enfatisá na Sr. Costeau ku e mega proyekto akí ta sumamente balioso pa nos ekonomia i ku esaki ta pone nos un paso mas serka di un desaroyo ekonómiko duradero pa Kòrsou. E plan di sr. Costeau ta, pa start e mega proyekto Proteus na aña 2026, sinembargo Minister Cijntje a indiká ku di su parti e lo hasi tur loke ta na su alkanse pa for di 2025 Proteus keda kla i sr. Costeau a aseptá e reto akí!