VVRP, MEO I AQUALECTRA TA LANSA KAMPAÑA “KÒRSOU BAN BIBA FIN DI AÑA”

Pa stimulá nos dòrna nos kas, áreanan públiko i negoshi ku lus di fin di aña

VVRP, MEO I AQUALECTRA TA LANSA KAMPAÑA “KÒRSOU BAN BIBA FIN DI AÑA”

Willemstad- Aqualectra den estrecho koperashon ku Ministerio di Transporte, Tráfiko i Planifikashon Urbano (VVRP) i Ministerio pa Desaroyo Ekonómiko (MEO) ta lansa e kampaña “Kòrsou ban biba Fin di Aña”. E kampaña aki lo ta un kompetensia ku e meta pa stimulá famianan, gruponan den bario i tambe empresanan pa dòrna kas, área públiko i negoshi den fin di aña p’asina krea e ambiente di temporada di fin di aña ku lus riba nos isla. Pa partisipá mester inskribí no mas lat ku 9 di desèmber próksimo dor di manda un e-mail ku nòmber, direkshon (adrès) kaminda lo dòrná i number di telefòn na communications@aqualectra.com. Un ekipo di hurado lo pasa entre 10 pa 29 di desèmber na e adrès partisipante pa husga kua ta e kasnan, áreanan públiko i negoshinan ku a sobresalí. Di e forma aki Ministerio di VVRP, MEO i Aqualectra, ta enkurashá un i tur pa aportá na e ambiente di fin di aña. Alabes, nan lo sòru dòrna i iluminá nos sentro di siudat.

Parti di e kompetensia ta enserá ku lo tin premio pa esnan ku partisipá. E premionan ta partí den e tres kategorianan di partisipashon na e kompetensia, kual ta kas, área públiko den bario i negoshi. Pa kategoria di kas tin tres premio. E promé premio den e kategoria aki ta Nafl. 1000,-, e di dos premio ta Nafl. 750 i e terser premio ta Nafl 500,-. E área públiko den bario ku resultá esun mas bunita dòrná ta risibí Nafl. 2.500,- ku lo keda entregá na un organisashon karitativo di e grupo ganadó su eskoho. E empresa ku e adorno mas bunita lo keda rekonosé públikamente komo e ganadó di e kategoria aki.

Ta bon pa indiká ku adorno i instalashon di e adorno ta pa kuenta di e persona òf grupo ku ta dòrna nan propiedat òf área públiko. Aqualectra lo pèrkurá pa konektá e adornonan den área públiko riba su ret di koriente. Lo tene un seshon di informashon pa grupo òf personanan ku partisipá dor di dòrna áreanan públiko den bario, p’asina kompartí e instrukshonnan ku mester kumpli kuné pa por konektá riba e ret di koriente di Aqualectra.

Ban partisipá Huntu na “Kòrsou Ban Biba Fin di Aña” p’asina Kòrsou bria den fin di 2022.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: