Aqualectra ta supliká komunidat pa paga tinu i trafiká responsabel: APENAS A KABA DI INSTALÁ ADORNO I LUS KU YA OUTO TA PASA I HASI DAÑO

Aqualectra ta supliká komunidat pa paga tinu i trafiká responsabel:

APENAS A KABA DI INSTALÁ ADORNO I LUS KU YA OUTO TA PASA I HASI DAÑO

Willemstad- No ta poko ta e esfuerso i invershonnan ku a keda hasí pa por duna nos sentro di siudat un toke festivo den e fin di aña aki. A pone entre otro adorno di pasku iluminá na varios sitio den diferente área na Punda i Otrobanda. Lamentablemente, apenas a kaba ku e trabounan i ya outomobilistanan ku ta kore di forma iresponsabel a kibra e adornonan na e retònde dilanti di CMC. Dor di e akto di e shòfúr konserní lo no por iluminá e retònde dilanti di CMC awenochi. Aqualectra ta lamentá esaki i ta hasi un apelashon na un i tur pa kuida e adornonan aki dor di kore na un forma responsabel na e retòndenan ku a keda dòrná i iluminá.

E esfuerso aki di Aqualectra, den estrecho koperashon ku Ministerio di Desaroyo Ekonómiko (MEO) i Ministerio di Tráfiko, Transporte i Planifikashon Urbano (VVRP) ta netamente dirigí pa enrikesé e eksperensia di temporada di fin di aña pa komunidat kompletu. Vandalisashon di e adornonan ta pone ku parti di nos sentro di siudat ta lusi ménos i mester hasi dòbel esfuerso i invershon pa bolbe drecha e loke a keda kibrá. Pa e motibu aki un apelashon ta bai na un i tur pa kuida e adornonan aki. A tene debido kuenta ku espasio pa tráfikashon responsabel na e áreanan ku a keda dòrná i iluminá. Úniko kos ku komunidat mester koperá kuné ta di trafiká di forma responsabel.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: