PUNDA I OTROBANDA TA BRIA AWOR KU LUS I ADORNONAN DI FIN DI AÑA
PUNDA I OTROBANDA TA BRIA AWOR KU LUS I ADORNONAN DI FIN DI AÑA
Willemstad – Minister di Desaroyo Ekonómiko (MEO), Sr. Ruisandro Cijntje, huntu ku Minister enkargá ku Tráfiko, Transporte i Planifikashon Urbano (VVRP), Sr. Charles Cooper, a sende e lus i adornonan di fin di aña den nos sentro di siudat riba e promé anochi di kompra pa e temporada di fin aña. Entrante 24 di novèmber te ku 6 di yanüari 2023 tur ku bishitá nos sentro di siudat lo disfrutá di dekorashon i lusnan nèchi i bunita spesialmente pa e temporada di fin di aña. Ta despues di 3 aña ku ta bolbe dekorá nos sentro di siudat den un ambiente festivo di lus, loke no tabata posibel e último 2 añanan debí na e pandemia di COVID-19. E aña aki e kayanan i plenchinan prinsipal di Punda i Otrobanda ta yen yen di lus atrobe pa animá nos komunidat pa bini huntu, selebrá i disfrutá di nos temporada di fin di aña manera ta kustumber. E proyekto aki ta un esfuerso di Aqualectra, den estrecho koperashon ku MEO i VVRP. Nos sentro di siudat lo bria sigur na momentu ku nos konmemorá e di 25 aña ku Willemstad ta riba e lista di Patriminio Mundial di UNESCO.
Áreanan ku ta dekorá den Punda ta Wilhelmina Plein, Breedestraat, Handelskade i Gouverneursplein. Den Otrobanda a dòrna Breedestraat, parti di De Rouvilleweg sigui bai te na e área dilanti di botonan di Ferry, Plasa Brion i finalmente parti di Pater Euwensweg te na e área dilanti di CMC. Na tur a hasi uzo e aña aki di entre otro 945 meter di tela, 6.282 meter di ‘sparklights’, 10.885 meter di ‘ropelights’ i 3.300 meter di aluminio i ‘ijzerstaaf’. E aña aki tabatin varios reto. Disponibilidat di material i tambe transporte den mundu sigur a hunga un ròl. Apesar di e retonan aki, tòg a logra terminá nèt na tempu.
Aqualectra ta ekstendé un invitashon na komunidat di Kòrsou kompletu pa bin tira un bista i disfrutá di e dekorashonnan i p’asina gosa di e ambiente ku nos sentro di siudat ta ofresé den e temporada di fin aña.