GOBIÈRNU DI KÒRSOU TA RENOBÁ KOMBENIO DI ATMINISTRASHON KU FUNDASHON MARSHE

MINISTERIO KONSERNÍ DESAROYO EKONÓMIKO

 

GOBIÈRNU DI KÒRSOU TA RENOBÁ KOMBENIO DI ATMINISTRASHON KU FUNDASHON MARSHE

PUBLIKÁ RIBA 24 NOVÈMBER 2022


Willemstad- Djaweps, 24 di novèmber Minister di Desaroyo Ekonómiko, Ruisandro Cijntje, a renobá e Kombenio di Atministrashon (Beheerovereenkomst) ku Fundashon Marshe na nòmber di Gobièrnu di Kòrsou. Di parti di Fundashon Marshe, e kombenio a keda firmá pa señora Liezelot Braaf kende ta direktor aktual di e fundashon. E Kombenio di Atministrashon akí ta enserá e derechi i debernan di tantu Fundashon Marshe komo di gobièrnu pa ku maneho i operashon di e edifisionan di gobièrnu ku ta keda usá pa aktividatnan di marshe den Sentro di Siudat, esta Plasa Nobo, Plasa Bieu i Plasa Otrabanda. Esaki ta inkluí tambe áreanan di marshe den sentro di siudat kaminda tin stènt òf otro konstrukshonnan ku ta pertenesé na gobièrnu, manera Sha Caprileskade. Den e Kombenio di Atministrashon akí a inkluí tambe e palabrashonnan ku a keda hasí entre MEO i Fundashon Marshe pa medio di un desishon di Konseho di Minister fechá 22 di mart 2017. Den e desishon akí, e Konseho di Minister a bai di akuerdo pa amplia e tareanan di Fundashon Marshe di tal forma ku nan ta responsabel pa supervisá tur standplaats, inkluyendo standplaats pa artista, i tambe bendementu di produkto di forma ambulante (venten) den sentro di siudat, pa asina hasi sigur ku tantu personanan ku tin un standplaats komo bendedónan ambulante ta kumpli ku loke ta stipulá den nan pèrmit.

Huntu ku esaki, e tareanan regular di Fundashon Marshe ta enserá, entre otro e responsabilidat pa mantené e diferente edifisionan i áreanan di marshe den sentro di siudat i tene nan limpi, atraé hürdónan nobo pa e espasionan i stèntnan ku bira bashí, sera kontratonan di hür ku e usuarionan i kobra plaka di hür mensualmente pa e uso di e área/sitionan di marshe den sentro di siudat, i duna guia na e (potensial) hürdó. Tur esaki ku e meta pa stimulá aktividatnan ekonómiko den sentro di siudat, i duna empresarionan mikro i chikí un espasio pa por start nan negoshi i e apoyo nesesario pa despues nan por sigui krese i amplia nan negoshi.

Konforme e Kombenio di Atministrashon, MEO ta responsabel pa trabounan di mantenshon na e edifisionan. Aktualmente MEO a kuminsá ku e proseso di destaho públiko pa por skohe un kontratista pa hasi mantenshon na Plasa Nobo, usando fondonan ku Minister Cijntje a logra atkerí.

Na aña 2018 Gobièrnu di Kòrsou ya a firma un Kombenio di Atministrashon ku Fundashon Marshe. Despues di evaluashon di e temporada ku a pasa, tantu Gobièrnu di Kòrsou (MEO) komo Fundashon Marshe a konsiderá deseabel pa kontinuá ku e loke a keda kumbiní, tresiendo mas ku klaro adaptashonnan kaminda ta nesesario den e kombenio nobo, basá riba e resultado di e evaluashon i tambe riba desaroyonan nobo. E Kombenio di Atministrashon nobo ta bálido pa un periodo di tres (3) aña.

 

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: