Ministerio di Salubridat, Medio Ambiente i Naturalesa ta informá: ÚLTIMO FECHA PA PASA TÈST PA KARCHI DI KÙR PA AÑA 2022 TA DJAWEPS 15 DI DESÈMBER
Ministerio di Salubridat,
Medio Ambiente i Naturalesa ta informá:
ÚLTIMO FECHA PA PASA TÈST PA KARCHI DI KÙR PA AÑA 2022 TA DJAWEPS 15 DI DESÈMBER
WILLEMSTAD- Departamentu di Kuido Tékniko di Higiena, sekshon di Eksaminashon i Edukashon ta partisipá ku e delaster fecha e aña aki pa someté na e prueba di konosementu básiko (keuring) pa esnan ku ta atendé ku kuminda i bibida kontra pago (èksamen pa food handler) lo ta djaweps, 15 di desèmber 2022. Despues di e fecha aki, e próksimo fecha pa pasa e prueba básiko pa por atendé ku kuminda i bibida kontra pago lo ta djamars, 3 di yanüari 2023.
E prueba básiko ta konsistí di un èksamen simpel estilo ‘multiple choice’ pa tantea konosementu di e foodhandler riba aspektonan importante di, entre otro, kon pa atendé ku alimento, preparashon di kuminda, maneho di temperatura, prevenshon di kontaminashon krusá (cross contamination), prosedura di limpiesa den kushina i higiene personal.
Ta importante pa realisá ku un foodhandler no ta solamente e hende ku ta kushiná, sino tur hende ku ta bini den kontakto di un òf otro forma ku e ko’i kome òf bebe. Ta nifiká ku, en prinsipio, for di e hende ku ta traha den kosecha di fruta i bèrdura te esun ku ta stiwa komestibel den depósito di un merkado, konforme lei, mester tin un karchi di kùr válido.
Otro detaye importante pa tuma nota di dje ta ku no ta tuma sèn kèsh mas na Zaquitó kaminda THZ ta ubiká aktualmente. E kliente por swaip pa un montante di Fls. 50,00 òf e por presentá un komprobante di pago ‘online’ via banko pa e montante ariba menshoná plùs un rekargo èkstra.
Departamentu di Kuido Tékniko di Higiene (THZ) ta hasi un apelashon na tur foodhandler pa probechá e periodo aki pa renobá nan karchi di kùr, ya ku ta antisipá ku ora aña bòltu i e aktividatnan di KARNAVAL 2023 dal aden, e fluho di hende pa kùr lo oumentá konsiderablemente. Por pasa e prueba di konosementu básiko pa foodhandler, di djaluna pa djaweps, di 8’or te 11’or di mainta i di 2’or pa 3:30 di atardi. Pa mas informashon por yama THZ na telefòn +(599) 9 432- 2867 di djaluna te ku djabièrne, di 8’or di mainta te ku 12’or di mèrdia i di 2’or te ku 4:30 di atardi.
