Parlamento di Kòrsou a trata un punto di agènda den Komishon Sentral.

Djaluna, 24 di ougùstùs 2026, Parlamento di Kòrsou a reuní den un Komishon Sentral despues di reseso, pa trata dos punto di agènda.

E promé punto ku a wòrdu trata tabata “Voorstel van Rijkswet houdende regeling van grondslagen voor zelfstandige algemene maatregelen van rijksbestuur die hun gelding dienen te behouden (Rijkswet delegatiegrondslagen artikel 38, tweede lid, Statuut voor het Koninkrijk) – 36 910 (R 2218)”. Visepresidente di Parlamento, sr. Ramón Yung, a habri e úniko tanda, di 35 minüt, pa Miembronan di Parlamento hasi nan disertashon i preguntanan tokante e tópiko. E preguntanan aki ta keda hinká den un relato ku lo bai atraves di “Tweede Kamer” pa Gobièrnu di Reino kontestá.

Miembro di Parlamento, sra. Giselle Mc William, a presentá un proposishon di òrdu pa skucha Minister di Hustisia su posishon, promé ku trata punto dos, “Voorstel van Rijkswet houdende regels met betrekking tot de uitlevering voor Aruba, Curaçao en Sint Maarten (Rijkswet uitlevering voor Aruba, Curaçao en Sint Maarten) – 36 925 (R 2219)”. Miembronan di Parlamento a bai di akuerdo ku e proposishon i e tratamentu di e punto a keda posponé te un próksimo aviso.