Tópiko: infrastruktura di barionan konstruí riba tereno priva.

Pa via di:  Presidente di Parlamento

Sra. America Francisca

Wilhelminaplein #4

Presente

 

Na atenshon di  presidente di komishon fiho di VVRP

Sr. Thode

Wilhelminaplein #4

Presente

 

Kòrsou, 30 novèmber 2022

 

Tópiko: infrastruktura di barionan konstruí riba tereno priva.

 

Apresiabel sr. Thode,

 

Pais Kòrsou su teritorio ta konsistí di 222 bario en total, repartí den 12 distrito. Algun di e barionan aki a keda forma riba terenonan di terser. Barionan manera Souax, Dein, Kanga, Juan Domingo, Emmastad i Julianadorp ta ehèmpel di barionan ku a keda konstruí riba terenonan priva.

 

Esaki ta trese kuné diferente retonan di infrastruktura, entre otro e responsabilidat kombiná pa fasilitá karetera, limpiesa i iluminashon. I tambe unda e responsabilidat di Gobièrnu ta finalisá i unda e responsabilidat di e doño di e tereno ta inisiá.

 

Gobièrnunan di turno, durante añanan a duna asistensia pa mehorá e infrastruktura di diferente di e barionan aki riba un base di proyekto. Pero esaki no á i no por sosodé di forma struktural, lokual ta komprendibel. Ku konsekuensia ku nos ta mira ku mayoria di e barionan aki, tin un infrastruktura spesialmente di kaya hopi deplorabel. E dianan di áwaseru aki, nos ta mira ku e situashon ta empeorá i na final di dia e abitante di e barionan aki, ta esnan ku ta sinti e molèsternan.

 

Teniendo kuenta ku esaki, suskritonan ta haña importante pa dialogá ku minister ofer di e tópiko spesífiko aki. I pa trese klaridat den kua ta e palabrashonnan ku Gobièrnu tin ku doñonan di e tereno aki,  tokante mantenshon i konstrukshon  di infrastruktura. Tambe pa huntu ku Parlamento wak kiko ta pasonan konkreto ku por tuma pa mehorá e situashon pa e abitantenan. Hasiendo uso di reglamentu di òrdu di Parlamento, suskrito ta pidi presidente di komishon fiho di VVRP pa yama un reunion ku e tópiko; ‘infrastruktura di barionan konstruí riba tereno priva’  i invitá minister Cooper di VVRP.

 

Danki di antemano,

 

Ana Maria Pauletta

Miembro di Parlamento, Partido Alternativa Real

Share this page to Telegram

This site uses Akismet to reduce spam. Learn how your comment data is processed.

%d bloggers like this: