WILLEMSTAD – Ministerio di Finansa a yega na e konklushon ku Selikor, apesar di a oumentá nan esfuersonan, no a kumpli kompletamente ku e kondishonnan pa por bini na remarke pa un siguiente tranche. E konklushon aki ta keda tresé dilanti den un karta ku minister di Finansa a manda pa direktor general di Selikor, sr. W.M. Kook, riba 1 di desèmber 2022. Pa por a bini na remarke pa e di dos tranche, Selikor mester a kumpli ku un kantidat di kondishon stipulá pa Konseho di Minister. Sin embargo, ta na ministerio di GMN komo e ministerio funshonal pa husga si Selikor a kumpli ku e kondishonnan akí. Kontrali na e konklushon di ministerio di Finansa, ministerio di GMN ta di opinion ku Selikor a kolaborá sufisiente pa responsabilisá e trabounan hasí i entrega di dokumentonan komo prueba konforme e kondishonnan fihá pa Konseho di Minister.

E karta ta deskribí, banda di e aklarashonnan di ministerio di GMN, remarkenan i konsehonan di ministerio di Finansa. Ta indiká ku ministerio di Finansa ta spera un mihó kolaborashon entre GMN i Selikor den futuro pa asina por realisá kontrolnan mas efektivo i efisiente. Un ehèmpel ta kumplimentu ku e eksigensia ku Selikor ta limpia 20 bario pa luna intensivamente.

Selikor a limpia un kantidat di bario den e lunanan tras di lomba manera entre otro, Weg naar Kenepa, Westpunt, Rio Magdalena, Barber, Dokterstuin, Ascension, Colonia, Tera Kora, Groteberg, Gato, Souax, Juan Domingo, Julianadorp, Klein Hofje, Kas Chikitu, Veeris, Wishi, Sta Helena i Gasparito. Sin embargo, ministerio di GMN ta di opinion ku Selikor no a kumpli ku e eksigensia aki. Esaki ta basá rib’e echo ku segun GMN, sinku bario ku mester haña prioridat pa e limpiesa akí no ta riba e lista ku Selikor a presentá. Ministerio di Finansa ta konsehá Selikor pa laga empleadonan interno i/òf kontratistanan saka potrèt pa demostrá ehekushon di e trabou.

Ademas ministerio di GMN por envolví komunidat mas den e proseso dor di krea e posibilidat pa nan por saka potrèt, duna testimonio i pone esaki riba Wèpsait /Facebook di e ministerio di GMN. Esakinan ta formanan práktiko i fásil pa dokumentá i responsabilisá e trabounan ehekutá.

Den e karta tambe ta elaborá riba e konstatatashon ku probablemente Selikor no tin e kustumber di responsabilisá su mes debidamente. Pa ku esaki ta referí na entrega lat di kuentanan anual kontrolá i e supuesto reportahenan di maneho ku no ta kumpli ku tur kondishon. Den e reportahenan di maneho akí lo minimal mester tin progreso di e plan di aktividat inkluso eventual medidanan korektivo pa alkansá e metanan i/òf rekuperá e retraso.

Promé ku ratifiká e plan di aktividat ministerio di GMN konhuntamente ku ministerio di Finansa mester kalkulá e gastunan korespondiente. Ministerio di Finansa ta konvensí ku e tipo di trayekto di kontrol akí lo stimulá un kambio di kultura den Selikor di manera ku Selikor lo ta mas proaktivo i lo sa di responsabilisá na tur esnan ku e tin di aber kuné, ku komunidat di Kòrsou na promé lugá.

Teniendo kuenta ku e evaluashon stipulá pa Ministerio di GMN ku Selikor a a kolaborá sufisiente pa responsabilisá e trabounan i entrega di dokumentonan komo prueba konforme e kondishonnan fihá, ministerio di Finansa a kalkulá e montante pa e tranchenan. E di dos tranche pa e vorskòt fondo di likides ta kalkulá na NAf 4.879.500.

A tene kuenta ku gastunan di eksplotashon, e montante pa paga kontratistanan i sobrá di e saldo di e promé tranche. Pa bini na remarke pa e di tres tranche, Selikor tin di kumpli ku tur kondishon ku a palabrá. Selikor tin ku responsabilisá tambe kiko el a hasi ku e di dos tranche. Ministerio di GMN mester sòru pa e kòntròl riba e servisio ku Selikor ta duna tuma lugá na tempu pa asina por adaptá debidamente.