MINISTER HATO TA INFORMÁ: DISPENSASHON PA ABOGADO PRO DEO

Minister di Hustisia tin e outoridat pa duna dispensashon na un persona ku no ta bini na remarke pa un abogado pro deo. Por pidi dispensashon pa bini na remarke pa un abogado pro deo solamente pa kasonan sivil.

Entrada anual

Si bo entrada anual (no ta trata akinan di solamente entrada pa medio di trabou) ta mesun tantu òf ménos ku sueldo minimo, bo ta bini na remarke pa un abogado pro deo. Si ta trata di un konflikto di labor bo entrada pa aña no por surpasá e montante di NAF 12.000,00. Si dado kaso bo entrada anual surpasá e montante menshoná pero bo entrada ta entre NAF 12.000,00 pa 22.500,00, bo ta bini na remarke pa abogado pro deo bou di e kondishon ku bo mes mester aportá ku un montante dependiendo di bo entrada anual.

Den kaso ku bo entrada anual ta mas haltu ku e limite menshoná i bo situashon ekonómiko no ta pèrmití bo di paga un abogado, bo por risibí dispensashon di Minister di Hustisia.

Prosedura pa hasi petishon pa kasonan sivil

Pa hasi petishon pa dispensashon pa bini na remarke pa un abogado pro deo den un kaso sivil (por ehèmpel problema ku bo doño di kas òf ku bo doño di trabou òf den kaso di divorsio) mester tuma un komprobante di entrada deklará na Ofisina di Impuesto. Ku e komprobante aki mester akudí na un ofisina di Kas di Bario, ku lo referí bo na Ministerio di Hustisia si ta nesesario. Si bo wòrdu referí na Ministerio di Hustisia, Kas di Bario mester stèmpel bo komprobante di entrada i pone un firma riba esaki. Ku esaki bo mester presentá na konsulta di Ministerio di Hustisia. Kas di Bario ta disponé di tur informashon ku ta regardá petishon pa abogado pro deo i tin konsulta pa guia un persona i adishonalmente por asistí ku petishon pa dispensashon dirigí na Minister di Hustisia.

Prosedura na Ministerio di Hustisia

Ministerio di Hustisia tin konsulta pa dispensashon pa bini na remarke pa un abogado pro deo. Na e konsulta lo bo risibí un splikashon di e prosedura i un lista di rekisito ku mester entregá pa por hasi e petishon pa dispensashon. Pa traha sita pa konsulta por tuma kontakto ku Ministerio di Hustisia na number di telefòn: +5999 463 0600.

Si bo ta bini na remarke, Minister di Hustisia lo firma un Dekreto Ministerial (Ministeriële Beschikking) den kual ta indiká ku bo ta risibí dispensashon pa un abogado pro deo. Bo ta hiba e Dekreto Ministerial na bo ofisina di Kas di Bario i eynan bo lo obtené mas informshon. Den kaso di un konflikto laboral bo mester akudí ku e Dekreto Ministerial na Ministerio di Desaroyo Sosial, Labor i Bienestar, sektor di labor, i e konsulènt lo sigui guia bo.

Kaso penal

Si bo tin un problema di derecho penal i bo a wòrdu detené òf a wòrdu enkarselá, bo no mester hasi e tramitenan ariba menshoná. Bo ta haña bishita di un abogado outomátikamente òf bo ta haña oportunidat pa yama bo abogado.