Evaluashon di aksesibilidat di Nieuwestraat pa vehíkulonan di emergensia

Willemstad – Resientemente, diferente organisashon gubernamental a realisá un simulashon den Nieuwestraat pa evaluá e aksesibilidat pa vehíkulonan di emergensia, i identifiká eventual kalamidat den e área.

Brantwer Kòrsou, Kuerpo Polisial Kòrsou (KPC), Ministerio di Desaroyo Ekonómiko (MEO), Servisio pa Planifikashon Urbano (ROP), Servisio pa Obra Públiko (OW), i Domeinbeheer a hasi esaki.

E meta tabata pa midi aksesibilidat di e área pa servisio di emergensia, i asina protehá seguridat di negoshi, habitante, i bishitante.  A kolektá informashon práktiko tambe pa eventual mehorashon di e espasio públiko.

Durante e simulashon, a observá i dokumentá e situashonnan ku a presentá. Kada organisashon a identifiká puntonan di atenshon for di su propio responsabilidat, ku lo wòrdú diskutí den reunionnan planiá pronto. Basá riba e simulashon, lo formulá rekomendashon i posibel medida pa mehorá e aksesibilidat i seguridat den e área.

Entre e medidanan ku ta wòrdú evaluá ta e posibilidat pa sera Nieuwestraat pa tráfiko motorisá entre 6:00 di atardi pa 6:00 di mainta. E opshon aki ta forma parti di un análisis mas amplio ku tin komo meta garantisá un ambiente mas sigur pa peaton, sin komprometé e aksesibilidat pa servisionan di emergensia.

Manera ta konosí, Pietermaai a eksperensiá un kresementu signifikativo den aktividatnan komersial i turístiko. Esaki a resultá den un oumento konsiderabel di bishitante, speshialmente durante oranan di anochi. Den momentunan di hopi aglomerashon, e kombinashon di peaton ku tráfiko motorisá por krea situashon di riesgo. E evaluashon ta kontestá tambe un petishon presentá pa Stichting Pietermaai pa eksplorá medida ku por kontribuí na un área mas sigur i mas aksesibel.

Despues ku tur instansianan reuní i analisa nan puntonan di atenshon, lo formulá un konseho komun. Esaki lo sirbi komo base pa un desishon balansá, ku ta tene kuenta ku e interesnan di habitante, empresario, bishitante i servisio di emergensia.