KUERPO POLISIAL KÒRSOU 

 

KOMUNIKADO DI PRENSA

217/2026 

13 yüli 2026 

Hefe di Kuerpo ta aktua konforme su responsablidat pa maneho i funshonementu diaro di e Kuerpo 

Resientemente, Hefe di Kuerpo Polisial Kòrsou a tuma nota di diferente deklarashonnan  hasi den medionan di komunikashon dor di e presidente di sindikato NAPB. Aunke ku  den ningun di e deklarashonnan aki Hefe di Kuerpo ta wòrdu menshoná eksplísitamente,  e manera ku esakinan a wòrdu formulá a hiba na interpretashón ku ta referí aki na Hefe  di Kuerpo i/o asta na otro miembronan di e Tim di Maneho. 

E deklarashonnan di e presidente di NAPB ta basá riba un kontakto ku Hefe di Kuerpo a  tuma kuné pa hasi apelashon riba un miembro, ku por sierto apenas resientemente a  pasa pa forma parti di e direktiva diario, regresá temporalmente su puesto di trabou. For  di e deklarashonnan aki por dedusí ku e presidente di NAPB ta sugerí ku Hefe di Kuerpo  lo mester a aktua riba instrukshon “di ariba”. Komo tal e ta relashoná e kontakto aki ku  aktonan di intimidashon i represaya den konekshon ku un suseso resien. 

Hefe di Kuerpo ta haña importante pa klarifiká e situashon i pone bon kla kon e asuntu  aki ta hinka den otro. 

Konforme e lei- i regulashonnan vigente, Hefe di Kuerpo ta e outoridat responsabel pa e  maneho i funshonamentu diario di Kuerpo Polisial Kòrsou. E responsabilidat aki ta  atribuí na dje direktamente dor di lei i no ta dependé di instrukshonnan di kualke otro  outoridat pa e por kumpli ku su debernan. Den un estado di derecho, kada outoridat ta  aktua den e kuadro di e kompetensianan ku lei ta asigná na dje. 

Den kuadro di e responsabilidat legal aki, i a konsekuensia di un situashon agudo ku a  surgi, algun dia pasá Hefe di Kuerpo a tuma kontakto ku e presidente di NAPB pa hasi un  apelashon riba un miembro di e direktiva diario regresá temporalmente na su puesto di  trabou, te ora ku e situashon agudo aki keda resolvé. Hefe di Kuerpo ta enfatisá ku e  kontakto aki a tuma lugá eksklusivamente for di su propio responsabilidat komo  outoridat enkargá ku e maneho diario di Kuerpo Polisial Kòrsou. E kontakto aki  

no a tuma lugá a base di ningun instrukshon, indikashon òf òrdu di kualke otro persona  òf instansha “di ariba”.

Durante di e kombersashon ku e presidente di NAPB, ku segun Hefe di Kuerpo a kana  den un ambiente ameno i konstruktivo, a wòrdu spliká e motibunan ku a hiba na e  situashon agudo i pakiko e regreso temporal di e miembro en kuestion tabata konsiderá  nesesario. Esaki hustamente pa garantisá e kontinuidat di e servisio polisial. Tambe  mester indiká ku aserkamentunan di e mesun índole a tuma lugá den pasado. Pues esaki  no ta nada inusual òf èkstraordinario. Durante di e kombersashon, e presidente di NAPB  a indiká ku e lo deliberá e petishon ku su direktiva, i no a duna ningun indikashon ku e  aserkamentu lo bira motibu di kualke kontroversia. 

P’esei, Hefe di Kuerpo ta sorprendí ku awor e kontakto aki ta wòrdu relashoná ku un  diferensia di opinion ku, segun e deklarashonnan públiko, ta eksistí entre e presidente  di NAPB i algun outoridat ku no ta wòrdu menshoná eksplísitamente. Hefe di Kuerpo no por rekonosé ni komprondé e relashon ku ta wòrdu poné entre e apelashon ku el a hasi  den ehekushon di su funshon i e alegashonnan di intimidashon òf represaya. 

Hefe di Kuerpo kier enfatisá, ku den ehekushon di su funshon, e no ta presta su mes ni e  demas miembronan di e Tim di Maneho pa wòrdu usá komo instrumento den  diferensianan di kualke naturalesa entre otro aktornan. Kualke alegashon òf  insinuashon ku Hefe di Kuerpo òf otro miembro di e Tim di Maneho a partisipá den  aktonan di intimidashon, ta un responsabilidat ku ta keda kompletamente pa kuenta di  esnan ku a hasi e alegashonnan ei. Hefe di Kuerpo ta rechasá di forma kategóriko kualke  insinuashon di e índole aki. 

Finalmente, Hefe di Kuerpo kier reiterá ku tur su akshonnan den ehekushon di su  funshon, ta basa eksklusivamente riba e lei- i regulashonnan vigente. Den tur su  aktuashonan, e úniko propósito ta pa garantisá un funshonamentu efektivo di Kuerpo  Polisial Kòrsou, protehá e interés general i sigurá e kontinuidat di e organisashon. 

E enfoke primordial di Kuerpo Polisial Kòrsou ta, i lo sigui ta bou di tur sirkunstansia,  salvaguardiá trankilidat, seguridat i òrdu públiko pa medio di un servisio polisial di  kalidat ku e komunidat di Kòrsou ta spera.