Ayera riba 6 di dezèmber 2022, Gobièrnu di Kòrsou i Kuerpo Polisial Kòrsou a bini huntu pa konmemorá e hecho ku 25 aña pasá Sr. Edward Plaate a pèrdè su bida hasiendo su trabou komo polis esta di “Sirbi i Protehá” e komunidat di Kòrsou.

Sr. Edward Plaate a kuminsá su karera den kuerpo polisial dia

promé di ougùstùs 1990. Den un tempu kòrtiku Sr. Edward Plaate a demostrá ku realmente e tabata yamá pa ehekutá e tarea di “Sirbi i protehá” nos pais komo polis. Ser polis no ta simplemente un trabou komun i koriente pero e ta un yamada. Sr. Edward Plaate sigur a duna oido na e yamada aki i a skohe pa sirbi su pais.

Riba e anochi fatal Sr. Edward Plaate den su ora liber ta kana yega na un sitio i

topa un siudadano den problema ku un grupo di hòmber. Komo un bon polis Sr. Plaate mesorá ta sinti su mes yamá pa intervení den e problema aki, pa evitá ku esaki ta sali for di man. Den Sr. Plaate su afan pa protehá e siudadano aki, e grupo di hòmber a lanta kontra Sr. Plaate i no tabata dispuesto pa respetá outoridat.

Sr. Plaate tabata un polis balente i el a hañ’e ta lucha fuerte kontra di e grupo di hòmber aki, hinkando su mes den un situashon di riesgo haltu. Sr. Plaate a hasi tur loke tabata na su alkanse pa finalmente e bin pèrdè su bida kumpliendo ku su yamada di “Sirbi i protehá”.

Sr. Edward Plaate nos ta keda rekordá bo komo un polis ku hopi kurashi, balentía, sentido di patriotismo i un gran ehèmpel pa nos tur. Na nòmber di Gobièrnu di Kòrsou Minister Hato a gradisí famia ayera pa a pèrmití Sr. Edward Plaate di por a “Sirbi i protehá” nos pais te n’e último dia di su bida. Minister Hato ta deseá famia hopi forsa i ku Sr. Edward Plaate su alma por sosegá na pas.