PAR selebrando 29 aniversario

den ambiente fenomenal

Riba 14 di desèmber último, Partido Alternativa Real, funda pa sr. Miguel Pourier (qepd), a selebrá su di 29 aniversario den gran forma. Komunidat di Kòrsou a wòrdu invitá pa durante henter e dia pasa i selebrá ku PAR, na e asina yama “Sede Habri”. Di 10’or di mainta te ku 5’or di mèrdia por a pasa na sede di PAR pa tuma un salú i konektá ku direktiva, frakshon, miembro i lider polítiko di PAR sr. Quincy Girigorie.

E dia a kulminá den un selebrashon pa miembresia den kual despues di palabra di presidente di partido dr. Michel Berry, un brindis di sr Quincy Girigorie i bendishon di Pastoor Bakhuis i Pastoor Jose Luis a transmití e programa di radio semanal di lider polítiko sr. Quincy Girigorie, ‘Konektá’. Den su programa e la kombersá ku lider polítikonan anterior di PAR, den persona di sr. Etienne Ys, sra. Zita Jesus Leito i sr. Eugene Rhuggenaath. Durante e transmishon live esnan presente por a disfrutá di un programa yena ku historia ku no ta semper konosí serka otronan dunando komunidat un bista berdadero di e partido i kiko PAR ta para p’e.

E selebrashon tabata un sin igual ku muzik di un DJ, pasa boka, kos di bebe i hopi ambiente.

Ku e selebrashon aki PAR a start e periodo ku ta ‘ Rumbo pa 30 aña di PAR’. Komunidat sigur mester keda pendiente di otro aktividat, fundraising i inisiativa ku PAR lo tuma den kuadro di esaki pa kual su kulminashon lo ta 14 di desèmber 2023.