‘XPLORATION COASTLINE CURAÇAO’; 1 MION LITER DI AWA DIARIO PA USO AGRARIO I AYUDO HUMANITARIO

 

‘Xploration Coastline Curaçao’

Willemstad- Entrante aña 2024, ‘Xploration Coastline Curaçao’ lo produsí 1 mion liter di awa pa dia destilando awa di laman. E awa akí ta bai keda usá pa desaroyonan agrario lokal pero tambe pa duna sosten humanitario den region i den reino den kaso di un desaster òf kalamidat. ‘Xploration Coastline Curaçao’ ta usa solamente energia sostenibel pa por produsí e kantidat di awa akí diariamente. Tur produkshon di awa i instalashonnan pa prosesá awa, inkluso ‘generators’ di energia lo ta riba un plataforma flotante.

Dia 7 di desèmber último, Konseho di Minister a bai di akuerdo pa risibí ‘Xploration Coastline Curaçao’ i djaweps 8 di desèmber tres di e ‘stakeholders’ den e proyekto akí a firma un akuerdo pa desaroyo di e infrastruktura lokal nesesario pa por usa huntu ku e instalashon flotante di ‘Xploration Coastline Curaçao’.Ta trata aki di Aqualectra Multi Utilities, University of Curaçao (UoC) i OceansX.
Ministerio di Desaroyo Ekonómiko (MEO), huntu ku Ministerio di Salubridat Públiko, Medio Ambiente i Naturalesa (GMN) ta pushando pa e purifikadó di awa flotante akí yega nos isla pronto. Esaki mirando ku e konsepto di ‘Xploration Coastline Curaçao’ ta pas hopi bon den Kòrsou su plan di rekuperashon ekonómiko i ku e ‘roadmap’ di implementashon di Gobièrnu di Kòrsou pa ku e metanan di desaroyo mundial sostenibel i seguridat alimentisio.

Mas ku djis produsí 1 mion liter di awa diariamente, ‘Xploration Coastline’ su mishon ta pa tin diferente di e plantanan flotante akí i konektá esakinan ku komunidatnan i otro regionnan di mundu. ‘Xploration Coastline Curaçao’ ta e promé pasó den realisá e meta akí dunando bida na un konsepto ikóniko ku lo kontribuí i engrandesé prosperidat den henter region.

Durante gran parti di aña ‘Xploration Coastline Curaçao’ lo ta stashoná na Kòrsou pa asina por kontribuí na realisá seguridat alimentisio. Den e kaso akí, e 1 mion liter di awa ku keda produsí diariamente, ta bai ta disponibel pa agrikultura. Ku stashonamentu di ‘Xploration Coastline Curaçao’ akinan, kostonan di invershon i tambe di mantenshon ta keda dividí i e awa ku keda usá pa agrikultura ta keda na un preis rasonabel i ekonómiko. Si surgi un kalamidat den region òf den reino, ‘Xploration Coastline Curaçao’ ta brinda ayudo humanitario na e pais i komunidatnan akí di moda ku personanan afektá por tin akseso na awa kual ta e nesesidat di mas importante na momento di un kalamidat.

Djòin e kombersashon durante ‘Xploration Coastline Curaçao BOOST event’ otro aña di 9 pa 11 di mei 2023.

Riba dianan 9, 10, i 11 di mei 2023 e evento ‘Xploration Coastline Curaçao BOOST’ lo tuma lugá. Komersiantenan di sektor agrario lokal, abitantenan, organisashonnan di naturalesa i doñonan di tereno ta keda invitá pa bini ku plannan pa desaroyo di e área rondó di kaminda e plataforma lo bai keda stashoná. Lo presentá e plan akí na un grupo di maneho ku ta inkluí ministerionan di GMN, MEO, VVRP i AZ ku lo sòru pa hasi e plan un realidat i implementá e ideanan na forma di un maneho konkreto.

Ya kaba por kuminsá registrá pa forma parti di e inisiativa akí dor di manda un e-mail na info@oceansx.nl .Abitante- i komersiantenan tambe por komuniká ku OceanX via e e-mail akí pa haña mas informashon tokante e proyekto di ‘Xploration Coastline’.