Yegada di e terser grupo di ‘Marechaussee’ pa reforsá nos frontera

KOMUNIKADO DI PRENSA 595/2022
28 desèmber 2022

Yegada di e terser grupo di ‘Marechaussee’ pa reforsá nos frontera

Departamentu di Komunikashon i Prevenshon

KUERPO POLISIAL KÒRSOU SIRBI I PROTEHÁ
Dia 4 di febrüari 2021 un protokol a keda firmá ku pa e próksimo 7 añanan benidero, e
islanan Karibense di Reino Hulandes, lo risibí refuerso di supervishon i kòntròl na nan
fronteranan.
Krímen ku ta krusa frontera manera kontrabanda di droga, arma, hende, trafikashon di
hende i labamentu di plaka, tin un efekto perhudisial riba nos komunidat.
Banda di esei, e situashon sosial preokupante di Venesuela tambe ta pone supervishon na
nos fronteranan bou di preshon pisá.
E meta di e protokol aki ta pa tuma medidanan pa fortifiká e supervishon na frontera i di
otro banda drecha e koperashon di trabou entre e servisionan di e diferente paisnan.
Entre tantu riba 4 di yüli i 17 di òktober 2022 e dos promé grupo nan di ‘Marechaussee’ a
yega riba nos isla (Komunikado 402/2022)
Esaki ta enserá ku for di 4 di yüli 2022 “frontline” pa loke ta trata e supervishon di nos
frontera (tantu na aeropuero komo na haf) ta konsistí di koleganan di Kuerpo Polisial
Kòrsou i di ‘Marechaussee’.
Aparte di a okupá nan mes ku supervishon na nos frontera, traspaso di konosementu a
tuma lugá i nan a sabi di duna apoyo èkstra na e diferente servisionan.
Tur e trabounan aki a sosodé bou di responsabilidat di e ministernan di e respektivo islanan,
pa asina yega na un supervishon di frontera ku ta funshoná di un forma efektivo.
Tambe nan a reforsá e interkambio di informashon ku mester tin entre e diferente
disiplinanan i alabes e ehekushon di e taraeanan investigativo, tantu na aeropuerto komo
na haf.
Durante di e periodo ku a transkurí nos a invertí bastante den e prinsipio di mantenshon di
òrdu, investigativo i inteligensia. Nos a lográ intensifiká e koperashon di trabou entre tur e
servisionan tantu riba e tereno aéreo i marítimo. Di e manera aki nos ta ataká krímen
migratorio na un manera mas profeshonal, efisiente i efikas.
Pa dia 9 di yanüari próksimo nos ta spera yegada di terser grupo di ‘Marechaussee’ riba nos
isla. Den kuadro di seguridat di un i tur ku ta hasi uso di nos aeropuerto i haf por spera mas
kòntròl ku lo mester resultá den estorbo di krímen organisá trans-nashonal di manera ku
den e kaso aki Kòrsou, ta bira inatraktivo pa wòrdu usá komo pais di tránsito pa krímen.