Traspaso di trahadónan di SVB pa Landsontvanger

Na: Minister di Asuntunan Sosial, Labor i Bienestar

Sra. R. Larmonie

WTC- Piscadera Bay

Presente

 

Kòrsou, 03 yanüari 2023

 

Tópiko: Traspaso di trahadónan di SVB pa Landsontvanger

 

Apresiabel minister Larmonie,

 

Den medionan di komunikashon suskrito a tuma nota di e petishon di SVB pa traspasá 19 trahadó pa Landsontvanger komo resultado di medidanan di baha kosto di SVB. Ademas mi persona a keda aserká pa trahadónan di SVB, ku na e momentonan aki ta biba den un insertidumbre pa loke ta trata nan futuro laboral.

 

Gabinete Pisas den aña 2021 a tuma un desishon pa implementá medidanan di kontrol di gastu, pa asina por atendé ku e “ Schommelfonds “. Entre  otro e medidanan aki ta; baha  kosto di SVB, baha ku 10% e AOV di personanan ku ta biba den eksterior,  hasi e pakete di servisio di BVZ mas chikí, implementá un bahada den e tarifa di laboratorio i implementá un bahada di 12,5% riba gastu di personal di tur entidat ku ta risibí supsidio for BVZ. Niun di e medidanan ariba menshoná, pa 2 aña kaba no a keda finalisá. Lokual a krea un retraso enorme i ta peligrá aun mas e ‘Schommelfonds”.

 

SVB, CFT i Parlamento a alertá pa e situashon aki. Esaki ta hustamente un di e motibunan, dikon suskrito no por a bai di akuerdo ku e presupuesto 2023 manera el a keda entregá, desèmber último. I awor nos tur ta mira konsekuensia direkto di un presupuesto for di balanse i no basá riba realidat di e situashon di nos pais. ‘

 

Den kuadro di esaki, suskrito tin algun pregunta:

1. Komo minister responsabel pa SVB, sra. Larmonie por informá Parlamento, si e desishon di SVB pa traspasá 19 trahadó pa Landsontvanger, kuminsando 1 di yanüari 2023 tabata konosí pa sra. Larmonie?

Den kaso ku minister tabata na altura di e desishon i a bai di akuerdo ku esaki;

2. Minister por garantisá Parlamento i e 19 trahadónan ku ningun di nan lo pèrdè nan trabou? I ku nan lo mantené nan kondishonnan laboral?
3. Minister lo por informá Parlamento kon a informá e trahadónan di e desishon aki? I kon a prepará nan pa e kambio aki?
4. Minister lo por informá Parlamento, for di kua pòst lo kubri e gastu di kasi 2 mion adishonal riba presupuesto di pais, pa aña 2023?

Den kaso ku minister Larmonie no ta di akuerdo ku e desishon di SVB;

5. Minister lo por informá Parlamento kua ta e akshonnan ku minister Larmonie lo tuma, pa atendé ku e situashon ku a presentá aki i kon lo duna trankilidat na e trahadónan?

 

Atentamente,

 

Ana Maria Pauletta

Miembro di Parlamento Partido Alternativa Real