TRAHA BO SITA PA KÙR VEHÍKULO TREMPAN!

Willemstad – Servisio pa Tráfiko i Transporte (UO-VV) ta hasi un apelashon na tur doño di vehíkulo pa bin kùr trempan i evitá inkumbinensia. Preferiblemente, traha e sita nobo pa kùr minimalmente 2 siman promé ku e karchi di kùr kaduká! Tur esaki sigur mirando ku ya ta temporada ku mester paga number di outo.

Tur vehíkulo motorisá mester kùr pa nan por kore riba nos kareteranan. Pekùp, trùknan grandi i vehíkulonan ku pèrmit pa transporte públiko ta kùr kada aña, i sobra vehíkulonan ta kada dos aña. Ta hopi importante pa vehíkulonan ta di kùr. Esaki ta pa garantisá seguridat den tráfiko, mirando ku e vehíkulo ta den kondishon optimal pa e por kore sigur i ta evitá but.

Sita pa kùr
Por subi e website https://sitaautokeuring.gobiernu.cw/ pa traha un sita pa kur. Tambe por akudí na Lokèt di Pèrmit na Saliña pa buska un fecha. Tambe por yama na number di 4341690.

Riba e dia ku tin sita mester akudí na UOVV (ántes Keuringslokaal) trempan ku e karchi di kùr bieu, identifikashon bálido, huntu ku e suma rekerí ku ta fl. 30,=. Por ‘swipe’ òf paga via di ‘online banking’.

Na momentu ku e parti di kùr ta tras di lomba, ta haña un karchi di kùr nobo ku ta bálido p’e próksimo periodo.

Minister Charles Cooper ta spera ku tur doño di vehíkulo ta kumpli ku nan deber síviko di kùr nan vehíkulo i asina kontribuí na un tráfiko mas sigur.