MINISTER COOPER TA HASI TRASPASO DI YABI PA SENTRO MULTI FUNSHONAL SAPATÉ

Willemstad – Riba djabièrnè 13 di yanüari, Minister Cooper a hasi traspaso di yabi pa Sentro Multi Funshonal na Sapate na FKP i na Unidat di Bario. Minister Cooper di e forma aki, ta kumpli ku un parti importante di e kompleho di bibienda di FKP i Gobièrnu na Sapaté.

 

Un bario no mester ta konsistí solamente di kasnan i kayanan, pero tambe mester tin fasilidatnan manera e.o. fasilidatnan di formashon, deporte, rekreo, i fasilidatnan ku ta duna servisio na e bario konserní i su bisindario. Den kuadro di e bario nobo di Sapaté, a hinka den e proyekto ku a keda finansiá ku fondonan di Union Europeo, konosí komo e proyekto Lot 4 na e blok H di e plan di parselashon di Sapaté.

 

Ta trata di un edifisio bunita ku ta un sentro pa bario. E sentro multi-funshonal ta bai sirbi desaroyo di e habitantenan di e bario di Sapaté di un forma holisitiko. Esaki ta permití e habitantenan pa nan desaroyá nan mes físikamente i mentalmente sano.

E sentro multi-funshonal aki mester bira e sitio kaminda habitantenan, inisiativa partikular i Gobièrnu ta bai drai un programa di proyektonan di desaroyo na bienestar sosial, kultural, ekonómiko i finansiero pa tur habitantenan di bario di Sapaté.

 

Pa un bario por edifiká su mes, na promé lugá e habitante nan mester por ta dispone di fasilidatnan di formashon, di kultura i deporte i di rekreashon aksesibel i liber na nan disposishon. Ta p’esei ta di sumo importansia pa un bario nobo komo Sapaté traha huntu pa lanta e sentido di ta un bon bisiña pa otro, prinsipalmente den e tempu difisil ku nos ta pasando aden, e kontrol sosial ta un kondishon, pa un bisiña tira un bista pa e otro, pa garantisá mas seguridat pa e bario. P’esei Minister Cooper a pidi tur habitante di bario di sapaté pa laga ban koperá ku otro, dor di tuma e sentro multifunshonal aki komo parti integral di nan kasnan i duna e edifisio aki su kontenido di ta un sentro multi funshonal, liber i aksesibel pa tur habitante.

 

Na e organisashon ku ta bai kordiná e programa di desaroyo p’e habitantenan, ta hopi importante pa traha huntu ku e bario aki i pa trese proyektonan ku ta sirbi tur grupo di enfoke, edat i famianan. Nos mester keda kòrda semper ku famia ta e base di un bario i ku famia tambe ta e base di nos nashon Kòrsou.

 

Minister Cooper lo pasa FKP e maneho ii mantenshon di e sentro multi-funshonal, i FKP na su turno ta pasa e operashon diario den man di Unidat di bario.

 

Minister Cooper a felisitá habitantenan di Sapaté i pueblo di Kòrsou.