𝘔𝘪𝘯𝘪𝘴𝘵𝘦𝘳 𝘋𝘢𝘯𝘨𝘶𝘪 𝘖𝘥𝘶𝘣𝘦𝘳 𝗣𝗥𝗢𝗚𝗥𝗔𝗠𝗔 𝗗𝗜 𝗝𝗨𝗠𝗣𝟭𝟴 𝗧𝗔 𝗗𝗨𝗡𝗔𝗡𝗗𝗢 𝗕𝗢𝗡 𝗥𝗘𝗦𝗨𝗟𝗧𝗔𝗗𝗢
ORANJESTAD – JUMP18 ta un programa multidisciplinario den maneho di obesidad den muchanan, afilia na dr. Horacio Oduber Hospital. Actualmente tin un grupo participando activamente bou di guia di profesionalnan cu lo terminando fin di February 2023. Minister di Turismo y Salud Publico sr. Dangui Oduber ta contento di e resultado cu e programa ta dunando. E programa aki ta cuadra cu e plan nacional di prevencion di malesanan no transmisibel (NCD’s).
JUMP18 ta consisti di un grupo di hoben Arubano cu ta profesionalnan medico, cu bao guia di un pediatra a desaroya un iniciativa pa empodera muchanan y nan mayornan pa mehora nan salud y bienestar. JUMP18 su meta ta pa yuda mayornan y muchanan biba un bida mas saludabel por medio di educacion, ehercisio y retando nan percepcionnan limita. Por medio di e proceso aki, e acceso ta wordo crea pa mayornan y nan muchanan bolbe descubri nan balor berdadero hunto cu un conocemento mas profundo den loke ta nutricion y salud.
JUMP18 a cuminsa 14 di september di aña 2021 cu e meta pa haci un diferencia pa otronan, duna inspiracion y motivacion. Di e manera aki crea oportunidadnan nobo pa tur cu ta envolvi den e programa, por ehempel e mayornan, e profesionalnan y specialmente e muchanan. E programa tin un duracion di 6 luna, inicialmente e programa a cuminsa cu 18 mucha pero esaki a wordo aumenta awor na 36 mucha.
Minister Dangui Oduber ta gradici Dr.Jamiu Busari cu ta e fundador y “senior researcher” di JUMP18 pa bin cu e iniciativa aki, sigur un danki tambe na henter e team di profesionalnan medico di JUMP18 pa haci e programa aki un exito.
