Sta. Rosa Indians kampion Lipo Elhage RBI 2022-2023
WILLEMSTAD – Sta. Rosa Indians a logra un viktoria pèrta i dramátiko den un wega di deskite kontra Marchena Braves pa asina bira kampion di Lipo Elhage RBI 2022-2023 patrosiná pa MCB Bank. Marchena Braves despues di forsa un wega desisivo ganando djadumingu mainta mester a mira kon nan soño di bira kampion a disparsé ku un ‘deadball’. Marchena Braves a logra empatá wega den kabes di 7 ining na 8-8 pero den bom di e mesun ining ei, Indians ta logra yena base i ta bin gana ku skor di 9-8 pa via di deadball ya menshoná. Un kampionato sigur eksitoso ku partisipashon di 6 ekipo i kasi 100 hóben i pa promé biaha dediká na Lipo Elhage na felis memoria. E organisashon ku Lipo Elhage tabata enkabesá i ku tabata su bida, Sta Rosa Indians ku nan hóben manager Manny Boukhoudt a logra gana e máksimo título di e kampionato ku awor ta dediká na su persona. Picher ganador di e wega final aki tabata Rajengelo Paulina miéntras ku Judrick Profar a pèrdè pa Marchena Braves. Mihó bateadó pa Indians tabata Rochandley Cabrera ku a bai di 3-2 miéntras ku Judrick Profar mes tabatin e mihó bate pa Braves di 3-2.
Promé ku wega final a tuma lugá fo’i djasabra tabatin e weganan di dòbel eliminashon ku a kontinuá pa determiná ken ta pasa pa hunga den final. E promé wega a bai entre e dos ekiponan invikto den e buèlta di dòbel eliminashon. E ekipo ku gana ta pasa pa final i ku un bentaha grandi ku mester pèrdè dos wega den final pa no bira kampion. Sta. Rosa Indians a gana Royal Scorpions Cardinals ku skor di 5-0. Indians a pasa pa final i Cardinals mester a hunga un wega kontra di e ganador di e siguiente wega entre St. Michel Dodgers i Marchena Braves. Braves a gana e wega aki ku skor di 8-7. Pues finalmente djasabra Marchena Braves a topa Royal Scorpions Cardinals pa determiná ken ta bai final djadumingu kontra Sta. Rosa. Marchena Braves a gana e wega aki 8-7 i ta pasa pa final.
Djadumingu Marchena Braves tabatin e tarea difísil ku nan mester gan Sta. Rosa Indians dos biaha pa asina por gana e título. Esaki komo ku Indians no a pèrdè niun wega ainda den e buèlta di dobel eliminashon. Den promé wega Braves a gana ku skor di 12-2 pa asina forsa e wega final pa sa ken ta bira kampion.
Durante e dia final ayera di Lipo Elhage RBI tabatin un momentu bunita ora ku e representante di Torneo Fabb di e organisashon di Brievegat, Ernt Meyer a risibí dos kaha di bala for di Ben Thijssen di Torneo RBI i Curacao Baseball Development Foundation (CBDF). Torneo Fabb tambe tabata hungando su final pero pa e hóbennan di Little League i Minor riba e mesun dia aki. Algu ku semper Lipo Elhage tabata para pe ta pa e yudansa na e organisashonnan di Little League.
Finalmente e kampionato aki di Lipo Elhage RBI 2022-2023 no tabata posibel sin MCB Bank komo spònser prinsipal i tambe CBDF, KNBSB, MLB i Fundashon pa Nan.
