MFK ku ‘Radio Rochela’ pa kita atenshon for di Refineria.

Fin di desèmber MinFin a anunsiá riba su Facebook page, ku paso Quincy Girigorie a ataka su lider Pik Pisas, e lo ataka Quincy Girigorie bèk.

 

“Quincy, bo no ta tene lanta riba lomba di mi palu Pik”, tabata su palabranan.

 

Einan, e “show di Radio Rochela” a kuminsá.

 

Tur e show aki a kuminsá, despues ku dia 28 di desèmber último, mi persona den mi kalidat komo representante di pueblo i kontroladó di gobièrnu a kuestioná promé Minister Pisas riba su falta di liderazgo i su “skondementu pa responsabilidat” pa asina tapa kos mahos ku ta pasando den e negosiashonnan rondó di Refineria. Tur esaki, despues ku den Prensa a bira konosí ku tin  prueba palpabel ku diferente “partner finansiero” di CPR a entrega vários dokumento falsifiká den e negoshashon pa operá refineria.

 

Minister Pisas tabata na altura di esaki promé ku e Seniorenconvent i a skohe pa skonde e informashon aki pa parlamento. Mi a deklará den Prensa ku sea Promé Minister ta inkapas, òf e ta kómplise, ya ku e ta sigui negoshashon i te dia awe e NO a entrega keho na Ministerio Públiko.

 

Aki e “Radio Rochela” a sigui.

 

E aktitut di “krea un sirko pa tapa kos mahoso” aki ta típiko pa MFK. Último simannan, e “Radio Rochela” a bira pió! Despues ku den e reunion Públiko mi a kuestioná promé Minister na un forma skèrpi  pa su ròl dudoso den e kapítulo mahos aki, parlamentarionan di MFK, primeramente sr Thode, despues sr Brownbill, sr Yung i awor sr Seferina a “monta e show” ku mas intensidat pa asina kita atenshon for di e bòmbòshi mahos ku ta sosodiendo rònt di refineria. Asta simpatisantenan riba Facebook i sindikalistanan a djòin e “show”. E show ta kulminá djaluna awor, kaminda lo purba “mata e mensahero” tirando tur tipo di akusashon infundá pa loke ta trata wardakosta.

 

Komunidat OJO! No kai den trampa i kita atenshon for di e problema real. For di ora MFK monta un show asina grandi, ta paso tin kos hopi grandi i mahos pa tapa.

 

Entretantu vários keho a wòrdu entregá den e kaso mahos di RDK i CPR i lo no straña nos ku hendenan lo kai será den e kapítulo skur aki.

 

Te ku awe nada di nos Promé Minister! Reunion tokante Refineria ta di skòrs, kehonan ta sigui wòrdu entregá i Promé Minister ta den eksterior, tanten ku tin kosnan mahos sosodiendo rondó di RdK.

 

Komunidat, OJO! Radio Rochela tei, pa kita bo atenshon. Maske e dicho ta bisa ku “pa papiadó di bèrdat no tin stul pa sinta”, lo mi NO sukumbí pa intimidashon di MFK i lo mi sigui para pa integridat den e proseso di Refineria.