Nunka, mi ta ke a bira pastor

 

Komo un siñado di basta aña i studiá den e disiplina di teologia, Widney Martha di e organisashon “Life Changers” ta realisa ku falta hopi konosementu i komprondementu di e palabra di Dios mei mei di nos pueblo pero tòg tambe bou di e komunidat kristian. Otro kos ku Sr. Martha ta konstatá despues di un estudio hasi, ku hopi pastor òf lidernan ta prediká Hesus, pero poko ta prediká lokual ku Hesus a prediká òf a manda nos prediká.

Nos ta hopi okupá ku religion, asta aworakí tin iglesianan no sa kon pa deskribí e lokual ku nan ta paso nan no ke asosiá nan mes ku religion. I nan ta uza e frase nos no ta un religion pero bo mester tin un relashon ku Dios. En realidat nos mester ta parti di e Reino di Dios i prediká e Reino di Dios i Su Hustisia. I esei ta e úniko ku Hesus a prediká.

Widney Martha ta sigui bisa ku e ta mira hopi hende mara i pega den bida ku ainda ta struggle, paso nan ta biba segun e religion i tin ta biba segun lokual ku e mundu a siña nos. Pero nunka esaki tabata e intenshon original di Dios. P’esei ora hende purba diferente kos, diferente religion, finalmente nan ta keda desapuntá tòg. E bida di e Reino di Dios ta basa kompletamente riba otro prinsipionan i esei Hesus a bin pa ofresé.

 

Kòrsou ainda ta struggle pa añosnan, segun sifranan di CBS, ku 10% di asina yama kristiannan yena ku Spiritu Santu. Esei ta nifiká ku e iglesia di Dios no ta kresiendo. Pero tin lokual ku nan ta yama “ church shifting” esei ta nifiká esun iglesia òf religion lokal ta krese i e otro ta bira chikí. Pues mester traha duru pa alkansá e otro 90% di e poblashon. Si nos pais por yega na 90% di e poblashon komo Kristian, mi ta kere ku Kòrsou lo ta kompletamente un otro pais. Un pais ku ta avansando e Reino di Dios. Segun Sr. Martha, e tempu a yega pa mas trahadó pa e Reino di Dios meskos ku Hesus tambe a bisa.

 

Esaki a pone huntu ku un proseso largu, Widney Martha a akseptá e yamada di wòrdu ordená komo pastor.  Den kuadro di esaki lo tin dos anochi di avivamiento na Kòrsou ku Pastor Rudolph McEwan for di Canada. Dia 14 di febrüari Widney Martha i su kasa Laura Martha lo wòrdu ordená komo pastor di Life Changers Ministries i dia 15 di febrüari lo ta un anochi di ministrashon ku e Pastor McEwan. Pueblo di Kòrsou ta keda kordialmente invitá pa nos ban rebibá Kòrsou. Pa kualke informashon por yama òf app nos na 6907416. I boso ta keda invitá dia 14 i 15 febrüari.

 

Finalmente Widney Martha, ta mira ku Dios ta bai lanta Josuenan na Kòrsou, pa tuma e batuta over pa asina nos por krusa nos Jordan. Laga nos tin fe, ku nos mihó ta na kaminda i ku huntu nos por traha pa e pais aki por floresé. No wanta nos hóbennan mas abou, pero prepará nan pa nos por yega e tera primintí.