Pidimentu despensa pa sklabitut mester kana via Nashonnan Uní. Esei ta imparsial!

Nos gusta mediokresia. E kriminal (Hul) t’ei negoshá k’e viktima (Kòr). Unda imparsialidat a keda?

Durante fin di aña Trabou pa Kòrsou a sinta wak kon pueblo di Kòrsou atrobe ta wòrdu desviá for di e kaminda korekto. Inkluso a kuminsa menshoná sumanan ku lo ke ofresé pa ku e pidimentu di despensa. Den Reino na diferente okashon Kòrsou no a haña rason. Sea pa defisit demokrátiko i te asta e loke ku den Statuto mester regla disputa den Reino. Nunka esaki a keda klé i a wòrdu destruí pa èks-sekretario di estado señor KNOPS. Aworaki atrobe, na lugá di nos kana kaminda korekto, ata nos ta kore tras di e kriminal, ta pidi e kriminal pa e pidi nos despensa i pa nos ban diskutí ku e kriminal mes ku e mester paga.

Nos mester ta idiòt. Nashonnan Uní tin un komishon transparente i imparsial ku ta atendé diferente di e akshonnan aki. Kòrda ku pidimentu di despensa ta mará na pago di dañonan hasí, entregamentu bèk di artefaktonan i rikesa nan ku a wòrdu hòrtá i tambe e daño emoshonal. E komishon ku ta atendé e asuntunan di pidimentu di despensa aki na nòmber di gobièrnu di Kòrsou, no ta riba e ruta korekto. E ruta ku e komishon ta kanando lo sòru pa mas dolor i rabia. Pakolmo e ruta di e komishon ta un ruta kaminda bo ta dependé kompletamente di Hulanda i e ruta aki, konosiendo Hulanda, lo keda alarg’e te ku e ta bira mas sufrimentu.