PARTIDO MAN TA KONMEMORÁ 52 AÑA DI EKSISTENSIA I TA INSTALÁ SU LIDER POLÍTIKO NOBO

Willemstad: 6 di Febrüari 2023

Komunikado pa prensa di Partido MAN

Pa publikashon inmediato

 

PARTIDO MAN TA KONMEMORÁ 52 AÑA DI EKSISTENSIA I TA INSTALÁ SU LIDER POLÍTIKO NOBO

 

WILLEMSTAD – Djaluna anochi, 6 di Febrüari 2023, Partido MAN a konmemorá su di 52 aña di eksistensia durante un agasaho na Gaspa na Palu Blanku. Ophetivo prinsipal di e enkuentro,banda di selebrashon dibe aniversario, ta presentashon di lider polítiko nobo di e partido, Sra. Giselle McWilliam, na e invitadonan presente, komunidat di Kòrsou, i mundu ku por a sigui e evento via di medionan di komunikashon digital.

Despues di kanto di himno realisá pa e hóben artista Kadir Snijder, Sr. Kenneth Gijsbertha; den un rekuentro breve, a konta di historia di Partido MAN. E programa ofisial a kontinuá ku un diskurso di presidente di direktiva di Partido MAN, Irelnetty Copra. Sra. Copra a ekstendé  palabranan di elogio i gratitut na Sr. Steven Martina pa su labor desplegá komo lider polítiko di Partido Movementu Alsa Nashon durante último añanan. Sr. Martina tambe a dirigí algun palabra na esnan presente. Komo un muestra di gratitut, Sra. Copra, na nòmber di partido, a otorgá sr. Martina un obra di arte komo rekonosementu i apresio pa su trabou realisá pa Partido MAN en partikular, i Kòrsou en general.

Djis depues a sigui akto di traspaso di liderazgo na Sra. McWilliam, kende tambe a hiba un diskurso elokuente na esnan presente.

E enkuentro a finalisá ku un espasio di tempu durante kua esnan presente por a felisitá e lider polítiko nobo di Partido MAN i sosialisá.

Direktiva, miembronan i simpatisantenan di Partido MAN a deseá Sra. McWilliam hopi éksito ku su funshon i responsabilidat nobo.