NOS SELEKSHON NASHONAL MASKULINO U-17 TA KLA PA SAKA NOS KARA DURANTE E CONCACAF UNDER-17 CHAMPIONSHIP!

Tur kos ta kla pa nos selekshon nashonal maskulino kategoria U-17 saka nos kara durante e CONCACAF Under-17 Championship ku lo tuma lugá di 11 pa 26 di febrüari aya na Guatemala.

Awe nos selekshon ta tin su último seshon di training i nos hungadónan ta mentalmente i físikamente bon prepará pa representá nos isla.

 

Mañan mainta 9’or nos selekshon lo biaha Miami pa despues sigui rumbo pa Guatemala pa nos promé 3 enkuentronan durante e kampionato aki.

 

Skema di nos partidonan di e promé buèlta:

 

	Fecha	Orario	Tim di kas	Bishitante	Stadion
1	11-2-2023	6:00 PM	Mexico	Kòrsou	Doroteo Guamuch Flores (Guatemala City)
2	13-2-2023	6:00 PM	Kòrsou	Panama
3	15-2-2023	9:00 PM	Guatemala	Kòrsou

*Orario di Kòrsou

 

Despues di e promé i segundo buèlta lo sigui pa e partidonan di kuart final riba dianan 21 i 22 di febrüari 2023, e partidonan di semi final lo tuma lugá 24 di febrüari 2023 i e gran final lo ta 26 di febrüari 2023.

 

Nos selekshon ta wòrdu dirigí pa sr. Demy Rosario ku ta wòrdu asistí pa sr. Rowendy Sumter komo entrenadó di portero. Sr. Ebenezer Lourentz ta e masahista miéntras dòkter Ramfis Fillet tambe ta kompañá e selekshon i sr. Olivier Windster ta esun enkargá ku e materialnan di nos selekshon. Nos direktor tékniko sr. Dean Gorré i e ofisial di prensa sr. Rogier Schultz tambe lo biaha ku e selekshon i e hefe di delegashon ta sr. Remfis Donker, miembro di direktiva di FFK.

 

FFK ta deseá nos selekshon nashonal U-17 tur klase di éksito ku nan partisipashon na e CONCACAF U-17 Championship aya na Guatemala.