Damanan ku a perde riba Klein Bonaire a wordu lokalisa

Awe, djárason 15 di febrüari, dos dama turista a bai Klein Bonaire ku ‘watertaxi’ i segun deklarashon nan a bai kana den un area apartá/bandoná i despues nan no por a haña kaminda bèk pa kosta. Esei a pone ku nan a bèl e number di emergensia pa asistensia. Na e momentu ei sentral di polis a hasi uso di e sistema di lokalisashon pa identifiká e ubikashon eksakto di e damanan. Sentral di polis a dirigí STINAPA pa buska e damanan mientras a pone hèlikòpter di Wardakosta riba ‘standby’ i personal di STINAPA i di Kuerpo Polisial Hulanda Karibense a dirigí nan mes pa Klein Bonaire. Algun ratu pasá a logra enkontrá e damanan i a tresenan bèk kosta di Boneiru alrededor di 7.55 or di anochi.