Marchanan di karnaval 2023 a produsí un kantidat di 61 ton di shushi

Selikor NV ta satisfecho ku e akohida en general di personanan ku a bishitá e marchanan di karnaval i ku a hasi uso di e sakunan di shushi di Selikor ku a mara na dranghek riba e ruta di karnaval. E resultado por mira bèk na e trabou desplegá pa e tim di Selikor ku a perkurá pa e limpiesa despues di kada marcha.

Pa loke ta trata e komportashon di públiko nos mester bisa ku esaki tabata unu di aploudí. Áreanan manera Marchena, hanchi Polar, bou di Viadukto i Plasa Brion tabata área ku mas kantidat di shushi, práktikamente tur kaminda shushi a keda ofresé na un manera organisá i responsabel sea den kaha òf den saku. Kaminda tabata por, por a mira klaramente kon e shushinan tabata ofresé tur huntu na un sitio sentral ku Selikor por a pasa fásil i bai ku e shushinan. Otro ehèmpel ku por menshoná ta área di Rooseveltweg ku tabatin ménos shushi pero tambe públiko a deshasí di nan shushi di un forma korekto i bon organisá. Den hopi kaso usuarionan di stelashi a ofresé nan shushi den saku i pasa nan dilanti di e dranghek i pone nan kantu pa Selikor por pasa rekohé. Aki aya tòg tabatin algun shushi rondó i bou di stelashi pero no na kantidat signifikante ku por a trese opstákulo i tardansa den e trabounan di limpiesa ku Selikor a desplegá despues di kada marcha di karnaval.

Pa duna un kompilashon di e diferente marchanan; a rekohé despues di Marcha Hubenil 7.380 kilo i Despedida Hubenil 4.640 kilo. Marcha di “Teener” a rekohé 4.150 kilo, Marcha di Banda Abou a produsí un total di 3.040 kilo i Zongo 1.200 kilo.

Pa loke ta trata Marcha Grandi a rekohé 24.000 kilo i Marcha di despedida Grandi 16.400 kilo. Por bisa ku Marcha Grandi, pues esun den dia, a produsí mas shushi ku e Marcha di Despedida Grandi.

Ora suma tur e kilonan di e diferente marchanan huntu i ku e limpiesa ku a tuma lugá, nos ta yega na un total di 60.810 kilo rekohé pa e Marchanan di Karnaval di aña 2023.

Generalmente nos por konkluí ku e tipo di shushinan no a varia for di añanan anterior manera entre otro kùp, bòter, baki foam i saku di plèstik. Por mira tambe ku públiko a hasi uso di tantu e saku di shushi ku Selikor a mara na dranghek komo nan propio saku di shushi.

E trabounan di limpiesa despues di karnaval ta un aporte ku Selikor ta duna na diferente aktividat di karnaval i na karnaval 2023 den su totalidat. Si nos tradusí tur e trabounan akí den un plachi finansiero por bisa ku Selikor su aporte ta na balor di 107.046,00  florin.

Pa medio di e komunikado aki Selikor kier gradisí na tur e karnavalistanan, públiko presente, usuarionan di prekario pa nan aporte i tambe na e trahadónan di Selikor pa nan esfuerso laboral.

Finalmente Selikor ke sigui hasi un apelashon i motivá komunidat pa deshasí di nan shushi na un forma korekto i responsabel. Si kada un di nos hasi esaki, nos lo tin un Kòrsou limpi manera nos ke.