Gobièrnu tei yuda CMC si of no?

 

Bestuursaccoord, Regiegroep, awo menasa di kuratela, pero di yudansa mes nada.

 

 

Willemstad — Tratando di e problemanan di CMC, di oktober 2022 te awe, esta den 6 luna, Gobièrnu di Pisas ta dualdu entre un ‘Bestuurlijk Hoofdlijnenaccoord’, un kantidat di regiegroep, kwartiermakers, konsultants i awó hasta un menasa pa pone e direktiva di CMC bou di kuratela, djis paso nan a bolbé bati alarma. Mientrastantu yudansa mes ta sero-koma-sero.

 

Karta

Komo doño di CMC Kabinete Pisas a saka un karta pa CMC den kua e ta indiká ku e ta bai pone CMC su tim di maneho bou kuratela. E menasa ei ta inkomprendibel, pero riba su mes Partido PIN ta kontentu si ku hasiendo asina, despues di a pone CMC riba e lista di kompanianan i fundashonnan di gobièrnu, un biaha mas e gobiernu aki ta konfirma ku Kòrsou ta doño di CMC. Partido PIN ta spera, ku porfin awo si e mentira di partido MFK ku gobièrnu no ta doño di CMC ta pasa pa mundu di fabula.

 

Inkomprendibel

Den e karta gobièrnu ta akusá hunta di maneho di CMC di ta polítiko i no loyal, di ta krea paniko i di tin kulpa di tur e debakel finansiero dje hospital. PIN ke kuminsá atvertí pa e moveshon di MFK pa drenta kompanianan di gobiernu violando tur regla i lei pa regulá bon funshonamentu di e kompania- i fundashonnan aki. MFK i komunidat no mester lubida e rapòrt di prof. Willem ku a konstata ku bou di e prome gobiernu di MFK mas di 400 mion a disparse foi Aqualectra, Curoil i RDK netamente despues di intervenshon manera awor aki ta planeá pa CMC.

 

Pregunta

PIN ta kere ku komunidat i CMC merese kontesta di gobièrnu Pisas riba e preguntanan aki:

1. E regiegroep, kwartiermakers i konsultannan a produsí solushonnan konkreto pa CMC entre oktober 2022 i awe? Kiko e solushonan ei ta?
2. Gobièrnu ta haña ku CMC mester sinta ketu ku boka será si e ta mira ku obviamente e barku di kuido tei pega pasobra gobièrnu no ta karga su responsabilidat?
3. Dikón gobiernu ta haña ku metementu di politika direkto den CMC ta un bon idea?
4. Gobièrnu di MFK por primintí ku e biaha aki miones lo no disparse foi kompania di gobièrnu bou di su mando?

 

Kòrdá tambe, ku kabinete Pisas a bisa ku CMC ta pèrdé un mion pa siman!

 

Komunidat ta keda pendiente pa solushonannan konkreto pa CMC.