PÈRMIT TEMPORAL PA BENDE KOS RIBA RUTANAN DI SEÚ 2023

WILLEMSTAD- Pa por bende produkto riba rutanan di Seú 2023, mester di un pèrmit temporal di ‘standplaats’ òf ‘vent’. Esaki ta konta tantu pa esnan ku ta deseá di bende kos durante Marcha di Seú dia 10 di aprel próksimo, komo esnan ku ta deseá di bende kos durante Seú di Bandabou dia 23 di aprel. Un persona ku ta deseá di bende produkto durante ámbos marcha, mester hasi petishon pa kada un apart. Ministerio di Desaroyo Ekonómiko (MEO) ta urgi tur persona interesá, pa entregá nan petishon pa mas tardá 27 mart pa benta durante Marcha di Seu i 3 di aprel pa benta riba ruta di Seú di Bandabou na Lokèt di Pèrmit di moda ku esaki por keda prosesá na tempu. Un pèrmit di ‘standplaats’ temporal ta designá pa personanan ku ta deseá di para bende produkto for di un puesto fiho riba ruta di e marchanan i un pèrmit di ‘vent’ ta pa e persona ku ta deseá di bende su produktonan di forma ambulante. Tuma nota ku personanan ku ya ta bende kos riba e rutanan di Seú, mester hasi petishon tòg pa por risibí un pèrmit spesífiko pa bende kos durante e marchanan. E pèrmit temporal ta konta solamente pa e evento ku esaki a keda otorgá.

Riba loketdigital.gobiernu.cw por skohe sea ‘Standplaatsvergunning’ òf ‘ventvergunning’ i lesa tur informashon tokante rekesitunan nesesario pa hasi ámbos petishon, kon pa hasi bo petishon i kiko ta e gastunan mará na esaki.

Pa mas informashon, un i tur por tuma kontakto libremente ku Lokèt di Pèrmit via 434-1690.