Petishon pa dirigí pregunta na Minister di Salubridat Públiko, Medio Ambiente i Naturalesa

Presidente di Parlamento di Kòrsou

Señora Ch. America-Francisca

Wilhelminaplein # 4

PRESENTE

 

Willemstad, 13 di mart 2023

 

Tópiko: Petishon pa dirigí pregunta na Minister di Salubridat Públiko, Medio Ambiente i Naturalesa

 

Señora America-Francisca,

 

Pa medio di e karta aki, hasiendo uso di artíkulo 96 di Reglamentu di órden di Parlamento, mi kier pidi bo persona pa dirigí e karta athunto na Minister di Salubridat Públiko, Medio Ambiente i Naturalesa, señor Javier Silvania.

 

Danki pa e koperashon.

 

Atentamente,

 

 

 

Fergino Brownbill

Parlamentario pa

frakshon di MFK

Minister di Salubridat Públiko, Medio Ambiente i Naturalesa

Señor Javier Silvania
PRESENTE

Kòrsou, 13 di mart 2023

Tópiko: Posibel “annexatie” di algun playa pa CTB

 

Apresiabel señor Minister,

 

A bin na suskrito su atenshon ku posibelmente por tin un proseso adando pa por pone algun playa bou di maneho permanente di Curacao Tourist Board (CTB). Ta konosí ku CTB tin komo meta pa asistí komunidat i respektivo stakeholders den toma di desishonnan sosio-ekonomiko pa mantené pais su nòmber. Basá riba esaki CTB ya pa algun aña a bin ta yuda pais ku mantenshonnan di gran eskala na diferente playa.

 

E asistensia aki ta di sumo importansia teniendo kuenta ku e situashon finansiero di pais i tambe e kapasidat ku tin di empleado públiko. E forma di traha aki entre sektor di Agrikultura, Medio Ambiente i Naturalesa(LMN) i CTB a bin ta duna fruta. Pues e pregunta ku ta surgí ta dikon un traspaso di maneho permanente di playanan Caracasbaai, daaiboi, St. Crus, Lagun, Jeremi, Kenepa grandi i chiki i por último playa Fòrti?

 

Pendiente kontesta riba e pregunta aki suskrito ta di opinion ku sí kier tuma e paso aki gobièrnu tin ku tene kuenta ku lo siguiente. T’asina ku artikulo 92 di nos areglo di estado ta stipulá ku por medio di un ordenansa lo bini reglanan riba maneho di “domeinen en andere domaniale rechten”, esaki ta keda reglá den “Landsverordening domaniale gronden”. Pues den e ordenansa aki ta regla entre otro e maneho(beheerschap) di nos playanan.

 

Mas aleu den e Landsverordening ambtelijk bestuurlijke organisatie ta stipulá ku tin un Ministerio di Salubridat Públiko, Medio Ambiente i Naturalesa. I den e ministerio aki tin un sektor di Agrikultura, Medio Ambiente i Naturalesa ku tin komo tarea pa entre otro maneha Medio Ambiente, Naturalesa i paisahe, bou di kua kosta(playanan públiko) i ref.

 

Pues si t’asina ku gobiernu kier kuminsa un proseso di “annexatie” e tin ku bini Parlamento prome e tuma e desishon aki mirando ku posibelmente mester di kooperashon di Parlamento pa ku esaki. Pa e motibunan ariba menshoná i hasiendo uso di artíkulo 96 di Reglamentu di órden di Parlamento di Kòrsou, nos kier a hasi Minister Silvania e siguiente preguntanan;

 

1. Minister por informá suskrito si ta kuadra ku tin un proseso di “annexatie” pa pone e playanan ariba menshoná bou di maneho permanente di CTB?

 

1. Si t’asina, Minister por informá suskrito motibu di kambio di e manera di traha aktual teniendo kuenta ku te na e momentu aki no tabatin problema den e manera di traha?

 

1. Minister por informá suskrito ku mantenshon di playanan lo bira un di e core-business nobo di CTB?

 

1. Minister ta konsiente ku tin algun aspekto legal ku ta derivá for di nos Areglo di estado ku mester tene kuenta kune?

 

1. Minister ta konsiente ku empleadonan públiko ku ta laborá na e sektor di LMN ta preokupá pa eksistensha di nan trabou?

 

1. Minister por informá suskrito kiko lo para di e trabou di e empleadonan públiko ku ta laborá na e sektor di LMN?

 

1. Minister por informá suskrito ku di e forma aki Minister tin pensa di kita un tarea ku ta ser otorgá por medio di LABO na Minister?

 

1. Minister ta na altura ku e akshon aki posibelmente ta algu “unprecedented”?

 

Sperando ku Minister lo kontesta nos karta den e tempu definí den e protokòl firma entre gobiernu di Kòrsou i Parlamento, pa asina e Parlamento pero tambe empleadonan públiko di e sektor di LMN por haña mas infromashon di e posibel proseso aki.

Atentamente,

Fergino Brownbill

Parlamentario pa

frakshon di MFK