DELEGASHON DI KÒRSOU TA REUNÍ KU NATIONAAL CYBER SECURITY CENTRUM DI HULANDA
MINISTERIO KONSERNÍ TRÁFIKO, TRANSPORTE I PLANIFIKASHON URBANO
PUBLIKÁ RIBA 14 MART 2023
Willemstad – Resientemente, un delegashon gubernamental di Kòrsou a reuní ku Nationaal Cyber Security Centrum na Hulanda. Meta di e enkuentro aki tabata pa elaborá kon Kòrsou por traha huntu ku NCSC riba e tereno sibernétiko. Tur esaki komo parti di e esfuersonan di Minister Charles Cooper pa hasi Kòrsou mas resileinte pa loke ta seguridat sibernétiko.
NCSC ta kai bou di responsabilidat di e Nationaal Coördinator Terrorismebestrijding en Veiligheid (NCTV) di Hulanda. Komo organisashon gubernamental, NCSC tin tareanan manera entre otro atkerí mas konosementu riba e tereno digital, idenfiká rísiko i desaroyonan, konektá partidonan, konosementu i informashon, i fungí komo ‘Computer Security Incident Response Teams’. Nan ta duna sosten i konseho, hasi investigashon i analisis riba e tereno sibernétiko.
Durante di e reunion aki, NCSC a enfoká riba dos puntonan di atenshon, esta:
- Pa Kòrsou traha huntu ku Aruba i Sint Maaarten pa ku e trayekto di fortifikashon sibernétiko,
- Kiko e ta e funshon aktualmente di Caricert.
Di parti di e delegashon di Kòrsou, a trese dilanti ku na 2012 Kòrsou a lanta e organisashon National Cyber Emergency Response Team of the Caribbean (CARICERT). Tambe Gobièrnu di Kòrsou ta hasiendo diferente esfuerso riba e tereno sibernétiko pa duna mas kontenido i funshon na CARICERT.
Pa ku koperashon entre di NCSC i Caricert, NCSC ta wak dos posibilidatnan:
- Sosten di parti di NCTC pa desaroyo di strategia i leinan,
- Kontribuí pa sigui desaroyá CARICERT.
A palabrá konkretamente ku huntu ta bai analisá kon por duna mas kontenido na e dos trayektonan aki. Ademas NCSC a konsehá pa CARICERT kuminsá sera protokòlnan ku kompanianan forensiko.
E delegashon gubernamental di Kòrsou a konsistí di:
- Sekretario General SG di Ministerio Tráfiko, Transporte i Planifikashon Urbano Sr ir. D. Puriel,
- Hefe di Gabinete di Minister Cooper, Sra. mr. I. Pikerie, i
- Hefe di CARICERT, Sra. drs. E. Martis.
Di parti di NCSC tabata presente:
- Liesbeth Gaillard, Kordinadó di Terorismo i Seguridat pa NCTV
- Michiel Dirrenwachter, Konsehero di Sosiedat Digital di Ministerio di Asuntunan Eksterior (BZK)
- Martijn Junk, Lider di e tim di sosten, komunikashon, i tradukshon di maneho
- Jurrien Norder, Enkargá ku asuntunan sibernétiko
