AKUERDO BILATERAL PA SERVISIO ÁEREO NOBO ENTRE KÒRSOU I TRINIDAD & TOBAGO
MINISTERIO KONSERNÍ TRÁFIKO, TRANSPORTE I PLANIFIKASHON URBANO
PUBLIKÁ RIBA 16 MART 2023
Willemstad – Resientemente, Outoridatnan di Aviashon Sivil di Kòrsou i Trinidad & Tobago a bai di akuerdo ku kontenido di un akuerdo bilateral pa servisio áereo nobo entre e dos paisnan. Outoridat di Aviashon Sivil di Kòrsou a enkabesá e delegashon di Kòrsou. E akuerdo nobo aki lo remplasá e akuerdo bieu di 1997 ku tabata riba nòmber di Antias Hulandes.
E akuerdo nobo aki ta unu di karakter liber i ‘state-of-the-art’. Esaki ta enserá ku kompanianan di aviashon di tantu Kòrsou komo di Trinidad & Tobago awor lo por ofresé servisionan areo entre e islanan aki sin limitashon, i segun ku nan mes ta husga esaki komersialmente. Tur esaki teniendo kuenta ku kumplimentu ku reglanan i standartnan internashonal di seguridat.
E siguiente pasonan awor ta ku Konseho di Minister di Reino Hulandes mester aprobá e akuerdo aki, i representantenan ofisial di kada pais ta firm’e. E proseso aki total lo por dura mas o menos 3 luna.
Ekonomia i públiko en general di ambos pais lo benefisiá grandemente di e akuerdo aki.
