Ministerio di GMN a reuní ku Kunukuman relashoná ku problemátika di shushi na Kòrsou

Willemstad – Awe 16 di mart 2023, Minister di Salubridat, Medio Ambiente i Naturalesa interinó den persona di sr. Gilmar Pisas, kende ta enkargá ku e parti di Medio Ambiente i Naturalesa di Ministerio GMN a reuní ku “Kunukuman” i su tim. Den e reunion aki Minister Pisas i su kolaboradónan a deliberá tokante e problemátika di shushi riba nos isla pa di e forma aki yega na sierto palabrashonnan konkreto pa konhuntamente traha i yega na solushonnan struktural.
Den e reunion a indiká na “Kunukuman” i su tim ku gobièrnu ya kaba ta trahando riba un plan ku mester kondusí na solushonnan duradero pa Kòrsou su problemátika di shushi. Relashoná ku esaki Minister Pisas a indiká pa forma un grupo di trabou ku lo bai kaba di formulá e plan pa despues reuní un bes mas aki tres siman pa asina yega na un solushon struktural pa awor si atendé ku e problemátika di shushi na Kòrsou.
Na final Minister Pisas a indiká ku e ta boga pa hasi Kòrsou un perla den Karibe i pa esei mester konsientisá nos pueblo pa ban mantené nos dushi Kòrsou limpi.
E reunion a kana den un esfera positivo kaminda a palabrá tambe ku “Kunukuman” lo koperá ku Ministerio di GMN.