MINISTER HATO A REUNÍ KU EMPLEADONAN I TIM DI MANEHO DI SDKK

Mirando e instertidumbre i malkontentu ku ta reina bou di personal di SDKK, Minister Hato a presentá na e instituto pa papia ku e trahadónan. Sindikatonan ku tin representashon den SDKK tambe tabata presente pa sostené nan miembronan.
Ta ampliamente konosí ku e maneho di ‘’personeelsstop’’ ku gobièrnunan a bin ta hiba no a tene kuenta ku e fluho di trahadónan ku ta bai ku pènshun, VVU òf kita for di trabou. Esaki konsekuentemente a pone ku e kantidat redusí di trahadónan mester hasi e trabou ku tabata repartí bou di mas empleado.
Den kuadro di esaki e trahadónan kier a sa kiko ta ser hasí pa fortifiká e instituto ku mas trahadó.
Minister i tim di maneho a palabrá ku e trahadónan ku teniendo kuenta ku e situashon finansiero di pais, SDKK tin 3.2 mion florin disponibel den 2023 pa overtaim. Banda di esaki ta hasiendo ehersisionan ku gruponan di trabou konhuntamente ku sindikatonan pa atendé ku buki di funshon i balorá trahadonan ku ta hasiendo diferente funshon di ‘’waarneming’’. Ta e intenshon pa tur esakinan wòrdu finalisá dentro di seis (6) luna.