OUDITORIA DI INTERNATIONAL MARITIME ORGANIZATION (IMO) A KUMINSÁ PA KÒRSOU

Willemstad – Riba djaluna 20 di mart e Organisashon Internashonal Maritímo (IMO) a kuminsá ku su ouditoria pa loke ta trata asuntunan maritímo na Kòrsou. Meta di e ouditoria aki ta pa midi i konfirmá ku Kòrsou, komo parti di Reino Hulandes i pues miembro di IMO, ta kumpli ku e mishon i tarea di IMO. Pa medio di konvenio, kódigo, i leinan marítimo, e mishon di IMO ta pa salbaguardiá nos mundu marítimo, i kuida i protehá bida humano, karga, i material.

 

4 área di ouditoria:

Durante di e ouditoria aki, IMO ta kontrolá 4 área importante:

– Área komun. Esakinan ta regulá e diferente leinan i maneho pa ku e organisashonnan, pues kon esakinan tin ku funshoná.

– ‘Vlaggestaat’. Esaki ta implementashon di kódigo, konvenio i leinan marítimo ku e embarkashon tin ku kumpli kuné ora ku esaki ta karga Kòrsou bandera. Esaki ta regulá tantu e estado di e embarkashon, karga, i tripulashon.

– ‘Kuststaat’. Esaki ta determiná te na unda nos awanan teritorial ta yega i kon ta kontrolá/ protehá nos kostanan. Komo ehèmpel e ta enserá e reglanan relashoná ku fáraonan (‘vuurtorens’), mantenshon di esakinan, salbaguardiá i kuido di nos bida marino tantu riba laman komo bou di awa, nabegashon den nos awanan, fasilidatnan ku ta prosesá sushi, i zeta di embarkashon ku ta bishitá nos hafnan.

– ‘Havenstaat’. Esaki ta kòntròl di tur embarkashon ku ta bishitá nos puertonan, inkluso kon seguridat ta reglá na nos hafnan.

Pa loke ta trata Kòrsou, diferente instansia gubernamental lo pasa den e ouditoria. E organisashonnan di Ministerio di Tráfiko, Transporte i Planifikashon Urbano (VVRP), komo esnan responsabel pa asuntunan marítimo, ku lo pasa den e ouditoria ta:

– Organisashon di Maneho

– Outoridat Maritímo di Kòrsou (MAC)

– Havenmeester

– Kadaster

– Servisio Meteorológiko

 

Demas organisashonnan gubernamental ku tambe lo pasa den e ouditoria ta:

– Ministerio di Hustisia, esta  Ministerio Públiko (OM), i Warda Kosta

– Ministerio di Salubridat, Medio Ambiente, i Naturalesa

– Ministerio di Gobernashon, Planifikashon, i Servisio,

– Ministerio di Asuntunan General, esta Departamentu Hurídiko (WJZ), i Direktorado di Riesgo i Kalamidat (DRR)

Ouditoria di Reino Hulandes:

E ouditoria aki ta tumando lugá den henter Reino Hulandes, komo miembro di IMO. Pues esaki ta inkluí Hulanda i islanan BES, Kòrsou, Aruba, i St. Maarten. Tur pais ku ta miembro di IMO lo risibí un ouditoria kada 7 aña.

 

Konsekuensianan i resultado di e ouditoria IMO:

Reino Hulandes lo risibí 1 rapòrt ku lo ilustrá tur e resultado di e 4 paisnan bou di e bandera di Reino Hulandes. IMO lo publiká e raport aki.

 

Na momentu ku e rapòrt bira konosí, Kòrsou lo prepará pa atendé ku esaki pa di e forma ei kumpli ku kualke punto di atenshon ku a bin dilanti durante di e ouditoria.