Minister Shalten Hato LACHGAS LO WÒRDU PROHIBÍ PA PROTEHÁ HUBENTUT

Minister di Hustisia, Shalten Hato, ta informá ku e kuminsá e trayekto pa prohibí uzo di lachgas ku e meta pa protehá esnan ku ta uzo di esaki, en partikular nos hóbennan. ‘Lachgas’ ta algu hopi usá komo rekreo bou di nos hóbennan.
E lei pa prohibishon di lachgas ta sumamente importante mirando e dañonan permanente ku esaki por kousa serka usuarionan. For di promé di yanuari 2023 lachgas ta prohibí na Hulanda i mas pais den Oropa ta den proseso pa implementá e prohibishon aki. E prohibishon aki ta nase despues di vários investigashon sientífiko ku a konkluí ku lachgas por tin efekto severo permanente riba selebre di usuario. Mirando e tendensia ku den varios klup nokturno ta bende e asina yamá balòn ta imperativo pa un gobièrnu responsabel pone un paro na esaki.
E prohibishon di “lachgas” por yuda outoridatnan kompetente enormemente pa tuma medidanan inmediato kontra usuarionan di “lachgas” di forma di rekreashonal i ta kore ku bòternan di e “lachgas” den outo. Uzo di lachgas tin asta efekto riba komportashon den tráfiko di e usuario. Ku suerte, asta hopi aksidente den tráfiko por keda prevení.
Mas lei den tapara
Minister Hato resientemente a reuní ku Organisashon di Maneho (Beleidsorganisatie) kaminda a papia tokante diferente trayekto andando i proyektonan di lei ku tin prioridat pa Minister Hato i Gabinete Pisas II konforme e akuerdo I programma di gobernashon. E planesnan pa bini ku leinan nobo i adaptá algun lei eksistente ta kanando di forma sublime.
Den e Plan Stratégiko 2022-2025 di Ministerio di Hustisia tin varios lei i aspektonan di e kodigo penal vigente ku meresé atenshon pa hasi nos isla aún mas seif i sigur.
Algun di leinan ku ta den proseso, aparte di e prohibishon di lachgas, ta por ehèmpel lei nobo pa kompanianan di seguridat privá, kambio di kodigo di prosedimentu penal, kambio di e asina yamá ‘’gevangenismaatregel 1999’’ kual ta abilitá entre otro e subida di sèn di kantin, kambio di lei di arma di kandela i adaptashon di lei pa hasi kastigu pa poseshon di arma di kandela outomatiko mas severo.
Mas aleu a traha un skema di unda kada proyekto di lei ta aktualmente pa asina haña un bista di e progreso. Minister Hato ta sumamente kontentu ku e adelanto te ainda I ku pronto lo presentá e konseptonan di lei aki.