Dia Mundial di Tuberculosis

Willemstad – Ministerio di Salubridat, Medio Ambiente i Naturalesa (GMN) ta informá ku kada aña di nobo, dia 24 di mart, ta konmemorá Dia Mundial di Tuberculosis (TBC) pa konsientisá komunidat riba e malesa infeksioso i pa kombatí e malesa mundialmente.

 

Kiko ta Tuberculosis

TBC ta un malesa infeksioso ku ta wòrdu kousá dor di un bakteria, kual ta ser yamá “Mycobacterium tuberculosis”. E bakteria aki por afektá diferente órgano den un persona su kurpa, por ehèmpel pulmon, nir i wesu. Mundialmente, 25% di e poblashon ta infektá ku e bakteria, pero afortunadamente no ta tur persona ta bira malu. Un promedio di 5 pa 10% di personanan infektá ta desaroyá e malesa TBC.

 

Síntomanan di Tuberculosis

Síntomanan di TBC ta mayoria biaha síntomanan general ku por presentá serka diferente otro malesa tambe. Esaki ta hasi e rekonosementu di TBC hopi biaha fèrfelu.

 

Síntomanan di mas frekuente na kuminsamentu di TBC:

• Kansansio òf kurpa kibrá;
• Sodamentu anochi;
• Keintura;
• Pèrdida di apetit;
• Pèrdida di peso;
• Tosamentu pa mas ku 3 siman.

 

Síntomanan den estado mas avansá di TBC:

• Tosamentu ku sanger (slijm);
• Dolor den pechu.

 

Tuberculosis ta semper kontagioso?

Un persona ku desorayá TBC na pulmon por ta kontagioso. E persona ta (bira) kontagioso na momento ku e tin defekto den su pulmon i ku via di e trakto respiratorio e persona por traspasá e bakteria pa un otro persona. Den e kaso aki nos ta papia di un  “open- TBC”. Dor di hala rosea i prinsipalmente dor di tosa i nister fuerte, un persona ku “open- TBC” por kontagiá un otro persona. E riesgo pa keda kontagiá ta mas grandi ora tin kontakto intensivo, diariamente, ku un persona ku “open- TBC”.

 

 

Situashon di Tuberculosis na Kòrsou

Kantidat di kaso di Tuberculosis pa aña na Kòrsou, 2016-2022
2016	2017	2018	2019	2020	2021	2022
3	8	4	2	3	5	5

 

Kombatimentu di Tuberculosis na Kòrsou

Kombatimentu di TBC na Kòrsou ta un kolaborashon entre diferente organisashon i gruponan, e.o. Ministerio di GMN, Curaçao Medical Center (CMC), Dòkternan di Kas, Spesialistanan Médiko, Salú pa Tur (SpT) i Fundashon Yudansa pa Kòrsou (Voedselbank).

 

Pa mas informashon por yama departamentu “Infectieziektebestrijding” na telefòn:

432- 2860, 514- 2860 (por WhatsApp tambe) òf 515- 2860 (por WhatsApp tambe) di djaluna pa djabièrnè, durante orario di ofisina.