Personanan ku bishitá playa e dianan aki mester tene kuenta ku presensia di Pèchi Portugues

Willemstad – Ministero di Salubridat, Medio Ambiente i Naturalesa (GMN) ta partisipá ku a señalá Pèchi Portugues na parti sùit di Kòrsou. Manera ya ta konosí, práktikamente tur aña den e temporada aki ku hopi bientu, ta señalá Pèchi Portugues na parti sùit di Kòrsou. Ta konsehá personanan ku ta bishitá playa e dianan aki pa paga bon tinu. Pèchi Portugues ta relativamente fásil pa mira den laman. Ku mira algu manera un blas òf saku di plèstik lila yená ku airu ta drif den laman, no drenta awa i alertá esnan ku ta den laman e momentu ei pasobra su tentakulonan bou di awa por alkansá un largura di hasta 30 meter.

Pèchi Portugues ta biba den awanan mas den direkshon di kosta di Venezuela. E forma di e Pèchi Portugues ta di tal manera ku e ta move den laman den direkshon ku bientu ta supla. Si bo bini den kontakto ku e tentakulonan, kita restante ku keda riba e kueru sin grawat’é, laba e kueru ku awa di laman i apliká awa lou òf binager regular slap (1 pa 2 dòpi den 2 liter di awa) riba e área afektá. Si e área afektá keda kima òf hasi dolor intenso òf ku haña síntomanan di alergia manera dolor di kabes, sakamentu etc etc, pone eis riba dje i bishitá bo dòkter di kas.

Riba potrèt, Pèchi Portugues ku ta drif den laman.

Riba potrèt, un slòf pa kompará su grandura ku esun di un Pèchi Portugues.

Riba potrèt, por mira e parti di e Pèchi Portugues ku semper ta keda bou di laman i ku por alkansá un largura di 30 meter.