KRANSHI TA INTRODUSÍ PAPEL PROTEHÁ PA DOKUMENTONAN I STAMPIA DIGITALISÁ

WLLEMSTAD – Djaluna, 3 di aprel 2023, Departamento di Asuntunan Públiko (Kranshi) ta kuminsá hasi uso di stampia i ‘leges’ digitalisá. Na mes momento ta introdusí papel Protehá pa dokumentonan ofisial. Esaki ku e meta pa alsa servisio na komunidat di Kòrsou i hasi ofisinanan gubernamental mas efisiente posibel.

Introdukshon di papel Protehá (‘Beveiligd Papier’) ta nifiká ku lo prent por ehèmpel aktanan, ‘uittreksels’ i otro dokumentonan ofisial riba e papel ku tin karakterístikanan ku ta garantisá ku e dokumento ta outéntiko. Ademas un dokumento riba e papel Protehá akí semper lo tin un number úniko pa garantisá su outentisidat.

Pa loke ta trata stampia i ‘leges’, Kranshi lo introdusí e forma nobo di stampia digitalisá ku e sistema digitalisá di kasa modèrno ‘Key2Betalen’. Ku e sistema akí plakmentu di stampia i ‘leges’ riba dokumento otorgá pa Kranshi lo pasa pa historia. E sistema lo prent detayenan di e transakshon, inkluso preis di e dokumento, riba e papel Protehá. Ku esaki lo minimalisá grandemente sensibilidat di froude. Ademas e sistema akí ta yuda manehá transakshonnan finansiero mas efisiente i sigur ku posibilidatnan di rastreá e transakshonnan, lokual ku tabata difísil den pasado. Lo usa e sistema pa hasi tur pago, por ehèmpel pago pa haña aktanan, reibeweis i otro dokumento ofisial.

Kranshi ta anunsiá un periodo di transishon di seis luna kaminda dokumentonan ku no ta riba papel Protehá i ku tin stampia/’leges’ di plak, lo keda bálido. Ta pidi tur instansia pa tene kuenta ku e kambionan ariba menshoná, ora un kliente presentá ku dokumentonan riba papel Protehá.