SERVISIO DI IMPUESTO TA TRAHA 30.000 NUMBER DI CRIB NOBO

Manera a anunsiá anteriormente, ta obligatorio pa dunadónan di trabou inkluí e numbernan di crib di nan trahadónan den e ‘verzamelloonstaat’ pa aña 2022. Esaki a kousa problemanan práktiko pa diferente dunadó di trabou. Debí ku tin bia trahadónan no ta den servisio mas, dunadónan di trabou no ta logra yega na e number di crib di e trahadónan konserní mas. Pa e motibu aki, Servisio di Impuesto a ahustá kontrol riba e totalidat di number di crib den e ‘verzamelloonstaat’. Si a yena un fecha ku e trahadó a sali for di servisio ku ta promé ku 31 di desèmber 2022, no ta obligatorio pa yena un number di crib pa e trahadó ei.

Naturalmente mester yena e ‘verzamelloonstaat’ di akuerdo ku bèrdat. E ahuste aki no ta intenshoná pa skapa di e obligashon di yena number di crib. Dunamentu di informashon falsu na Servisio di Impuesto di pursi ta kastigabel. E eksepshon pa registrá un number di crib den ‘verzamelloonstaat’ pa empleadonan ku no a traha durante henter e aña ta konta solamente komo un regla transitorio pa aña fiskal 2022. Den e ‘verzamelloonstaat’ pa e aña aktual 2023, number di crib di tur empleado ta obligatorio. Esei ta enserá ku dunadónan di trabou mester registrá e number di crib pa tur empleado tambe den nan atministrashon di salario. Ta posibel pa personanan no residensiá na Kòrsou tambe pidi un number di crib via di www.belastingdienst.cw. Pa Servisio di Impuesto nashonalidat i státus di estadia no ta relevante den e kuadro aki. Ta fasilitá tur hende pa nan por kumpli ku nan debernan fiskal i primanan.

Pa a aselerá e entrega di number di crib pa kasi 30.000 residente ku ainda no tabata disponé di un number di crib, Servisio di Impuesto a krea un kantidat masal di number di crib durante di e último 2 simannan. Esaki ta pa aselerá e proseso di duna number di crib na trahadónan. Entrante di djaluna 3 di aprel, e departamento nobo, servisio di kliente, tambe lo duna asistensia na e suministro di number di crib. Di e forma aki, Servisio di Impuesto ta spera di por duna tur trahadó un number di crib na tempu, di manera ku dunadónan di trabou por entregá nan ‘verzamelloonstaat’ pa mas tardá djabièrnè 28 di aprel.